ABŞ Dövlət Departamenti Ər-Riyad üçün pilot təliminə və helikopter xidmətlərinə icazə verib

ABŞ Dövlət Departamenti Səudiyyə Ərəbistanına ümumilikdə 1 milyard dollar dəyərində xidmətlər göstərilməsinə icazə verib. Bu paket pilotların hazırlanması, helikopterlərə xidmət və digər zəruri maddi-texniki dəstəyi əhatə edir. Bu barədə məlumatı Pentaqonun Təhlükəsizlik sahəsi üzrə Əməkdaşlıq Agentliyi açıqlayıb. Bu agentlik hökumətlərarası müqavilələr çərçivəsində xaricə hərbi texnika və silah satışına məsuliyyət daşıyır.

Açıqlamaya görə, Dövlət Departamenti krallıq üçün helikopter pilotlarının təliminə və əlaqəli avadanlıqlara 500 milyon dollar ayrılmasını təsdiqləyib. Bu təlim proqramı "AH-64E Apache", "CH-47F Chinook", "UH-72A Lakota", eləcə də "UH-60L Black Hawk" və "UH-60M Black Hawk" modellərini əhatə edir. ABŞ həmçinin müxtəlif helikopter növləri üçün texniki xidmətin göstərilməsinə təxminən 500 milyon dollar ayırıb. Bundan əlavə, Dövlət Departamenti Bəhreynə F-16 təyyarələri üçün 445 milyon dollarlıq texniki xidmət və avadanlıqların təchizatına da icazə verib.

Vaşinqton administrasiyası artıq qəbul edilən qərarlar barədə Konqresi məlumatlandırıb. Qanunverici orqan bu potensial müqavilələri nəzərdən keçirmək və lazım gələrsə bloklamaq üçün 30 gün müddətinə malikdir. Pentaqon tərəfindən verilən zəmanətə görə, bu xidmətlərin göstərilməsi ABŞ-nin öz döyüş hazırlığına heç bir zərər vurmayacaq.