ADY-nin 9 ayda yük və sərnişin daşımalarından əldə etdiyi gəlirlər açıqlanıb

Azərbaycan Dəmir Yolları (ADY) QSC 2025-ci ilin yanvar-sentyabr aylarında yük və sərnişin daşımaları xidmətlərindən 296,391 min manat məbləğində gəlir əldə edib. Dövlət Statistika Komitəsindən verilən məlumata görə, bu göstərici ötən ilin eyni dövrü ilə müqayisədə 8,3% azalıb. Ümumi gəlirlərin azalması fonunda, şirkət sərnişin daşımalarında böyük yüksəliş qeydə alsa da, əsas gəlir mənbəyi olan yük daşımalarından daxilolmaların həcmi kiçilib. Gəlirlər strukturunda yükdaşımalar üzrə daxilolmalar 284 milyon 320,2 min manat təşkil edib, bu da ümumi mənzərədə 9,8% azalma deməkdir.

Yük daşımalarındakı azalma əsasən beynəlxalq istiqamətlərdən əldə edilən gəlirlərlə bağlıdır. Beynəlxalq istiqamətlər üzrə daxilolmalar 246 milyon 146,8 min manat olub və bu, 10,5% geriləməyə səbəb olub. Daxili istiqamətlərdə daşımalar isə 38 milyon 173,4 min manat gəlir gətirib, burada azalma nisbətən kiçik - 5,2% olub. Beynəlxalq yükdaşımalardan əldə edilən gəlirlərin tərkibində tranzit daşımaların payı 109 milyon 223,7 min manat səviyyəsində qalıb. Hesabat dövründə tranzit daşımalardan gəlir həcmində 18% kəskin azalma müşahidə olunub, bu da regional nəqliyyat axınlarında dəyişikliklərin olduğunu göstərir.

Yük seqmentindəki daralmaya baxmayaraq, sərnişin daşımaları maliyyə baxımından xeyli yaxşılaşıb. Hesabat dövründə dəmir yolları ilə sərnişin daşımalarından 12 milyon 71,1 min manat gəlir əldə edilib, bu da əvvəlki illə müqayisədə 48,4% artım deməkdir. Bütün bu məbləğ yalnız daxili istiqamətlərdə aparılan daşımaların payına düşür. Yanvar-sentyabr aylarında Azərbaycanın dəmir yolları ilə daşınan yükün həcmi 12 milyon 507.2 min ton (-10,3%) olub, lakin daşınan sərnişinlərin sayı 19,5% artaraq 7 milyon 156,8 min nəfərə çatıb. Tranzit yük daşımalarının həcmi 4 milyon 863,5 min ton təşkil edib, bu da 14% azalma deməkdir.