"Airbus" təyyarələrində texniki yoxlamalar aparılıb, uçuşlar normal rejimdədir - AZAL

Azərbaycan Hava Yolları (AZAL) aviaşirkəti "Airbus"dan rəsmi göstərişlər daxil olan kimi təyyarə parkında operativ texniki yoxlamalar aparıb. Bu yoxlamalar güclü günəş şüalanması səbəbindən A320 ailəsinə aid təyyarələrin idarəetmə sistemlərində yarana biləcək nasazlıqlarla bağlı idi. AZAL istehsalçı tərəfindən müəyyən edilən problemlərə dərhal reaksiya verib və bütün texniki məsələləri vaxtında, tam şəkildə həll etdiyini bildirir.

Aparılan yoxlamaların nəticələrinə əsasən, korreksiya tədbirlərinin görülməsi tövsiyə olunan üç təyyarə müəyyən edilib. Tövsiyələrə uyğun olaraq, şirkət həmin təyyarələrin proqram təminatını əvvəlki stabil versiyaya qaytardı. Hazırda aviaşirkətin bütün təyyarələri ştat rejimdə fəaliyyət göstərir və uçuşlar normal rejimdə yerinə yetirilir.

"Airbus" bu direktivləri A320 ailəsinə aid təyyarələrin idarəetmə sistemi ilə bağlı müəyyən nasazlıqlar aşkarlandıqdan sonra göndərmişdi. İstehsalçının verdiyi məlumata görə, güclü günəş şüalanması baş verən zaman uçuşun idarə olunmasında istifadə edilən bəzi məlumatlarda təhrif yarana bilir. Bu problem ekipajın iştirakı olmadan qəfil trayektoriya dəyişikliklərinə səbəb olan bir sıra hadisələrdən sonra ortaya çıxdı. Bununla əlaqədar olaraq, proqram təminatının növbədənkənar yenilənməsi prosesinə başlanılıb və hava gəmisinin istismarçılarına müvafiq göstərişlər verilib. AZAL-ın bu tövsiyələrə tam əməl etməsi aviasiya təhlükəsizliyi üçün atılmış mühüm bir addımdır.

Qeyd edək ki, "Airbus" güclü günəş partlayışlarının uçuş idarəetmə sistemində nasazlıqlara səbəb olduğu üçün A320 ailəsinə məxsus təyyarələrinin geri çağırıldığını elan etdi. Bu geri çağırılma təxminən 6000 təyyarəyə təsir göstərəcək ki, bu da dünya miqyasında xidmətdə olan bütün A320 təyyarələrinin yarısından çoxudur. AZAL hər zaman uçuşların təhlükəsizliyinin əsas prioritet olaraq qaldığını vurğulayır. Aviaşirkətin reysləri istehsalçının tələblərinə və beynəlxalq mülki aviasiya standartlarına tam uyğun şəkildə icra olunur.