AK Litvaya qarşı "hibrid hücumlara" görə Belarusa sanksiyalar tətbiq edəcək

Avropa Komissiyası (AK) Litvaya yönələn "hibrid hücumlar" səbəbindən Belarusa qarşı yeni sanksiyalar tətbiq etməyə hazırlaşır. Avropa Komissiyasının rəhbəri Ursula fon der Lyayen bu barədə Litva Prezidenti Gitanas Nauseda ilə danışıqların ardından məlumat verib. Minsk Litvanın hava məkanına meteozondlar (hava şarları) göndərməkdə ittiham olunur. Bu vəziyyət iki ölkə arasındakı gərginliyi xeyli artırıb.

Fon der Lyayen vurğuladı ki, Litva və Belarus sərhədində vəziyyət getdikcə pisləşir, çünki hava şarlarının Litva ərazisinə müdaxilələri artır. O, bu hərəkətlərə cavab olaraq, sanksiya rejimi çərçivəsində yeni tədbirlər hazırlandıqlarını bildirdi. Vilnüs iddia edir ki, Belarusdan olan qaçaqmalçılar siqaretləri keçirmək üçün heliumla doldurulmuş meteozondlardan istifadə edirlər. Bu fəaliyyətin ticarət məqsədi olsa da, hibrid hücumlar kateqoriyasına aid edilir, çünki dövlət sərhədinin təhlükəsizliyini pozur.

Son bir ayda bu cür müdaxilələr kütləvi xarakter alıb. Məsələn, oktyabrın 22-də Litva ərazisinə 200 şar daxil olmuşdu. Əlavə olaraq, bu gecə Litva səmasında 60-dan çox meteozond görünüb. Bu daimi təhlükə səbəbindən Vilnüs Beynəlxalq Aeroportu bir neçə dəfə fəaliyyətini dayandırmalı olub. Litva hökuməti qaçaqmalçıların meteozondlarına qarşı ən yaxşı müdafiə layihəsi təklif edən şəxsə 1 milyon avro mükafat elan edib.