Avropa Komissiyası Qara dəniz sualtı kabel layihəsinə "qarşılıqlı maraq doğuran layihə" statusu verib

Avropa Komissiyası (AK) Qara dəniz sualtı kabel layihəsinə "qarşılıqlı maraq doğuran layihə" statusu verib. Bu kabel Gürcüstanın enerji sistemlərini Avropanın enerji sistemləri ilə birləşdirməyi hədəfləyir.

Bu statusun verilməsi layihənin maliyyələşmə imkanlarını böyüdür. Belə ki, bu təşəbbüsün Avropa İttifaqı tərəfindən maliyyələşdirilməsi ehtimalları artır. Eyni zamanda, layihənin icrasını sürətləndirmək üçün xüsusi icazə və tənzimləmə prosedurlarından istifadə hüququ yaranır. Bu cür icazələr layihənin həyata keçirilmə müddətini xeyli qısalda bilər.

Layihə planına görə, kabelin ümumi uzunluğu 1 155 kilometr təşkil edəcək. Bu xətt Gürcüstanı birbaşa Rumıniya ilə əlaqələndirəcək. Bu yeni enerji xətti Rumıniya və Cənub-Şərqi Avropa ölkələri üçün genişlənmiş elektrik ixrac imkanları yaradacaq. Həmçinin, bu əlaqə vasitəsilə ticarət saatlıq elektrik enerjisi bazarı qiymətlərinə əsaslanaraq aparılacaq.