Azərbaycanda dənizçilər üçün xüsusi hazırlıq proqramına yeni səriştə əlavə olunub

Azərbaycan dənizçilərinin xüsusi hazırlıq proqramında mühüm yenilik tətbiq edilib. Bu dəyişiklik Beynəlxalq Dəniz Təşkilatının (BDT) Dəniz Təhlükəsizliyi Komitəsinin qətnaməsinə, həmçinin "Dənizçilərin hazırlanmasına, onlara diplom verilməsinə və növbə çəkməyə dair" Beynəlxalq Konvensiyaya əsaslanır.

Rəqəmsal İnkişaf və Nəqliyyat Nazirliyi yanında Dövlət Dəniz və Liman Agentliyi məlumat verir ki, yeniliyə görə Beynəlxalq Məcəllənin A-VI/1-4 Cədvəlinə (şəxsi təhlükəsizlik və ictimai məsuliyyət) yeni bir səriştə əlavə edilib. Bu yeni bacarıq zorakılıq və qısnama hallarının qarşısının alınmasına yönəlib. Bura cinsi qısnama, bulinq və cinsi zorakılıq kimi halların qarşısının alınmasına və onlara qarşı cavab tədbirlərinin görülməsinə töhfə vermək daxildir. Bu təlimlər dənizçilər üçün təhlükəsiz və etibarlı əmək şəraiti yaratmaq məqsədi daşıyır.

Bu yenilik "Bütün dənizçilər üçün təhlükəsizlik üzrə tanışlıq, ilkin hazırlıq və təlimat" adlanan xüsusi hazırlıq kursunun tədris planına təsir göstərdi. Yeni səriştənin öyrədilməsi üçün nümunəvi tədris planına 6 saatlıq vaxt ayrılıb. Nəticədə yenilənmiş proqramın ümumi müddəti 80 saat təşkil edir. Bu yeni standartların tətbiqinə dekabrın 1-dən etibarən başlanılıb. Bu addım Azərbaycan dənizçilərinin həm ölkə daxilindəki sularda, həm də beynəlxalq standartlara uyğun fəaliyyət göstərməsinə şərait yaradır.