Azərbaycanda mobil cihazlarda "Google Gemini"nin payı 61 % azalıb

Noyabr ayında Azərbaycanda süni intellekt (AI) "chatbot" bazarında "ChatGPT" mövqeyini daha da gücləndirdi. Bütün platformalarda, o cümlədən kompüter, mobil cihazlar və planşetlərdə, bu AI sistemi bazarın 94,07 %-ni təşkil etdi. Bu rəqəm oktyabr ayına nisbətən 0,52 faiz bəndi çoxdur. Digər tərəfdən, "Statcounter" agentliyinin hesabatına görə, əsas rəqiblərdən biri olan "Google Gemini" ciddi itkilərlə üzləşib. Onun ümumi bazar payı azalsa da, mobil cihazlar seqmentində 61% nisbi azalma müşahidə olundu. Bu nəticələr ölkədə AI alətləri arasında "ChatGPT"nin demək olar ki, təkbaşına hakimiyyət qurduğunu göstərir.

"ChatGPT"dən sonra ikinci pillə uğrunda gərgin mübarizə getdi. "Google Gemini"nin bazar payı bir ayda 0,41 faiz bəndi azalaraq 1,91 %-ə düşdü. Eyni zamanda, "Perplexity"nin bazar payı 0,40 faiz bəndi artaraq eyni səviyyəyə - 1,91 %-ə çatdı. Beləliklə, noyabr ayında ikinci yer iki AI sistemi arasında bölündü. Dördüncü yerdə 1,8 % bazar payı ilə "Microsoft Copilot" qərarlaşdı. Bu göstərici əvvəlki ayın rəqəmindən 0,62 faiz bəndi azdır. İlk beşliyi isə 0,32 %-lik payla "Claude" tamamladı. "Claude"nun payı oktyabr ayı ilə müqayisədə 0,12 faiz bəndi artmışdı.

Statcounter hesabatı süni intellekt chatbotlarının platformalar üzrə necə yayıldığını da açıqlayıb. Mobil cihazlarda "ChatGPT" xüsusilə güclü idi, payını 3,47 faiz bəndi artıraraq 94,77 %-ə çatdırdı. Ən böyük dəyişiklik məhz bu kateqoriyada baş verdi. Mobil cihazlarda "Google Gemini"nin payı 4,99 faiz bəndi azaldı, bu da təxminən 61 %-lik nisbi itki deməkdir; onun payı 3,27 % oldu. Eyni zamanda, "Perplexity" mobil seqmentdə payını 1,53 faiz bəndi yüksəldərək 1,96 %-ə çatdırdı. Kompüterlərdə isə "ChatGPT" 93,93 % paya sahib idi. Kompüter bazarında ən güclü rəqib 2,15 % payla "Microsoft Copilot" idi, lakin onun da payı 0,60 faiz bəndi azalıb. Kompüterlərdə "Google Gemini"nin payı 1,64 % təşkil etdi.

Platformalar üzrə paylara baxdıqda, planşet bazarında "ChatGPT" rəqiblərinə heç bir şans vermədi. Noyabr ayında planşetlərdə onun bazar payı 100 %-ə çatdı. Bu, oktyabr ayına nisbətən 14,29 faiz bəndi artım deməkdir. Ümumilikdə, noyabr ayı məlumatları Azərbaycanda AI chatbot bazarının demək olar ki, tamamilə bir şirkətin nəzarətində olduğunu göstərir. Digər kiçik rəqiblər - "Google Gemini", "Microsoft Copilot" və "Perplexity" - bazarda yer tutmağa çalışsalar da, onların ümumi payı hələ ki, çox aşağı səviyyədə qalır.