"Azercell Telecom"dan sosial şəbəkələrdə yayılan saxta təkliflərlə bağlı açıqlama

Sosial şəbəkələrdə "Azercell Telecom" MMC adından saxta paylaşımlar yayılır. Bu fırıldaqçılar dəyərindən xeyli aşağı qiymətə müxtəlif internet paketləri və tariflər təklif edirlər. Dələduzlar saxta təkliflərdən yararlanmaq istəyən şəxslərdən bank kartı məlumatlarının daxil edilməsini tələb edirlər. Nəticədə, istifadəçilərin məlumatları asanlıqla ələ keçirilir. Bu aldatmacalara inanan şəxslər ciddi maliyyə itkiləri ilə qarşılaşırlar. Azercell abunəçilərin maliyyə təhlükəsizliyini qorumaq üçün bu cür saxta kampaniyalara qarşı çox diqqətli olmalarını bildirir.

Azercell rəsmi olaraq bəyan edir ki, yayılan bu hadisələrin şirkətlə heç bir əlaqəsi yoxdur. Şirkət vətəndaşlara belə hadisələrlə rastlaşdıqda dərhal hüquq-mühafizə orqanlarına müraciət etməyi tövsiyə edir. Abunəçilər qeyri-rəsmi səhifələrdə edilən təkliflərə ehtiyatla yanaşmalıdır. Bank kartı məlumatlarını hər hansı bir sayta daxil etməzdən əvvəl, həmin ünvanın Azercell-ə aid olmasını və onun rəsmi sayt olduğunu mütləq yoxlayın. Naməlum şəxslərdən gələn zəng və ya SMS-lər əsasında ödəniş etməyin. Azercell adından gələn zənglərə də diqqətlə yanaşmaq və şübhəli hallarda məlumatları dəqiqləşdirmək lazımdır.

Abunəçilərin şəxsiyyət vəsiqəsi məlumatlarını etibar etmədikləri mənbələrlə paylaşması yolverilməzdir. Şirkət, həmçinin, şübhəli məzmunlu internet saytlardan uzaq durmağı tövsiyə edir. Belə saytlarda keçirilən müxtəlif oyun, müsabiqə, yarış kimi həvəsləndirici vədlər verən tədbirlərdən istifadə etməyin. SMS və ya “WhatsApp” mesajlarında göndərilən şübhəli linklərə daxil olmaqdan çəkinmək vacibdir. Naməlum şəxslər tərəfindən edilən saxta nömrə, xidmət təklifləri və məlumat sorğularına qarşı həmişə diqqətli olun. Azercell öz abunəçilərinin təhlükəsizliyini təmin etmək məqsədilə rəsmi kanallardan, Azercell Eksklüziv mağazalarından və rəsmi diler şəbəkəsindən istifadəni məsləhət görür.