Böyük Britaniya minlərlə qanunsuz miqrantı deportasiya edəcək

Böyük Britaniyada qanunsuz şəkildə yaşayan minlərlə vətəndaşın geri qaytarılması məsələsində Konqo Demokratik Respublikası (KDR), Anqola və Namibiya hökumətləri razılığa gəliblər. Bu addım Böyük Britaniya hökumətinin miqrasiya siyasətini sərtləşdirməsi fonunda atılıb.

“The Daily Telegraph” qəzetinə əsaslanan məlumata görə, bu razılaşma Londonun adı çəkilən ölkələrə qarşı viza məhdudiyyətləri tətbiq edəcəyi ilə bağlı xəbərdarlığından sonra verilib. Britaniya hökuməti qanunsuz miqrantların öz ölkələrinə qaytarılmasını təmin etmək üçün diplomatik təzyiqdən istifadə edir.

Bu plan çərçivəsində, Böyük Britaniyada məhkum edilmiş təxminən 4 min cinayətkarın bu ölkələrə deportasiyası planlaşdırılır. Deportasiya ediləcək şəxslərin əksəriyyəti cəmiyyət üçün risk yaradan və qanunsuz miqrantlardan ibarət olan məhkumlardır. Viza məhdudiyyətləri ilə bağlı verilən xəbərdarlıq KDR, Anqola və Namibiyanı geri qəbul prosesini həyata keçirməyə razı salan əsas amil oldu.