Gələn il Novruz və Ramazan bayramları ilə əlaqədar 11 gün qeyri-iş günü olacaq - YENİLƏNİB

Azərbaycanda 2026-cı ilin mart ayında əhali uzunmüddətli istirahət günləri ilə qarşılaşacaq. Novruz və Ramazan bayramlarının üst-üstə düşməsi səbəbindən ümumilikdə 11 gün ardıcıl qeyri-iş günü elan edilib. Bu qərar Nazirlər Kabineti tərəfindən verilib. Rəsmi təqvimə görə, Novruz bayramı martın 20, 21, 22, 23, və 24-ü tarixlərini əhatə edir.

Təqvimə baxanda, Novruz bayramı günlərindən martın 21-i və 22-si şənbə və bazar günlərinə, yəni həftəlik istirahət günlərinə düşür. Əmək Məcəlləsinin tələblərinə əsasən, belə hallarda bayram günləri növbəti iş günlərinə keçirilir. Buna görə də Novruz bayramı ilə əlaqədar əlavə qeyri-iş günləri kimi martın 25-i və 26-sı təyin olunur. Bununla da, sadəcə Novruz bayramı ilə bağlı istirahət müddəti martın 26-na qədər uzanır.

Lakin istirahət günlərinin bu qədər çox olmasının digər səbəbi Ramazan bayramıdır. 2026-cı ildə Ramazan bayramı da martın 20-si və 21-nə təsadüf edir. Əmək Məcəlləsinə görə, əgər Ramazan bayramı iş günü hesab olunmayan başqa bayram günü ilə üst-üstə düşürsə, bu halda növbəti iş günləri avtomatik olaraq istirahət günü sayılır. Bu tənzimləmə sayəsində martın 27-si və 30-u tarixləri də qeyri-iş günü olur.

Nəticədə Novruz və Ramazan bayramları birlikdə 20 martdan 30 marta qədər davam edən uzun bir istirahət zənciri yaradır. Bütün bu bayramlar və keçirilən istirahət günləri birlikdə hesablandıqda, martın 20, 21, 22, 23, 24, 25, 26, 27, 28, 29 və 30-u tarixləri ardıcıl qeyri-iş günləri olacaq. Beləliklə, vətəndaşlar yazın gəlişini və Ramazan bayramını 11 gün davam edən tətillə qarşılayacaqlar.