KİV: Tramp Madurodan noyabrın 28-dək Venesueladan getməsini tələb edib

ABŞ Prezidenti Donald Tramp və Venesuela lideri Nikolas Maduro arasında noyabrın 21-də telefon danışığı olub. Mənbələr bu danışığın 15 dəqiqədən az çəkdiyini bildirirlər. "Reuters" agentliyinin xəbərinə görə, Donald Tramp bu söhbət zamanı Maduronun ölkəsini bir həftə ərzində tərk etməsini tələb edib.

Bu, faktiki olaraq Venesuela rəhbərinə verilən ultimatum idi. Tramp Maduroya ailəsi ilə birlikdə Venesuelanı tərk etmək və istədiyi yerə getmək üçün 28 noyabr cümə gününə qədər vaxtının olduğunu söyləyib. Lakin Nikolas Maduro ölkəni tərk etməsi üçün müəyyən şərtlər irəli sürüb. Agentlik yazır ki, Maduro ailə üzvlərinə ABŞ sanksiyalarının ləğvi də daxil olmaqla tam hüquqi əfv veriləcəyi təqdirdə getməyə hazır olduğunu deyib.

O, həmçinin Beynəlxalq Cinayət Məhkəməsində ona qarşı açılan işlərin dayandırılmasını tələb edib. Əlavə tələblər arasında ABŞ-nin 100 venesuelalı rəsmi şəxsə qarşı tətbiq etdiyi sanksiyaların ləğvi də yer alırdı. Maduro israr edib ki, Venesuelanın icraçı Vitse-prezidenti Delsi Rodriqez yeni seçkilər keçirilənə qədər müvəqqəti hökumətə başçılıq etməlidir. Mənbələrə görə, Tramp Maduronun bu tələblərinin əksəriyyətini rədd edib.

Prezident Tramp ultimatum müddəti başa çatdıqdan sonra, noyabrın 29-da "Truth Social" platformasında çıxış edərək daha sərt mövqe nümayiş etdirib. O, bütün aviaşirkətlərin, pilotların, narkotik və insan alverçilərinin Venesuela üzərindəki hava məkanını tamamilə bağlamalı olduqlarını yazıb. Agentliyin məlumatına görə, Maduronun Venesueladan mümkün gedişi ilə bağlı danışıqların gələcəkdə davam etməsi ehtimalı var.