Macarıstanın Azərbaycandakı səfiri Diaspor Komitəsində olub (FOTO)

Azərbaycan Respublikasının Diasporla İş üzrə Dövlət Komitəsinin sədri Fuad Muradov ölkəmizdəki Macarıstan Respublikasının fövqəladə və səlahiyyətli səfiri Tamaş Yojef Tormanla görüşüb. Bu görüşdə iki ölkə arasında diaspora fəaliyyəti sahəsində əməkdaşlığın gücləndirilməsi və gələcək layihələr müzakirə edilib. Komitə sədri Azərbaycan Prezidenti İlham Əliyevin rəhbərliyi ilə aparılan uğurlu diaspora siyasətindən danışıb. O, həmçinin Macarıstanın Türk Dövlətləri Təşkilatının (TDT) diaspor qurumlarının görüşünə ev sahibliyi etməsinə diqqət çəkib.

Cənab Muradov bildirib ki, bu tədbir iştirakçı ölkələr arasında əlaqələrin dərinləşməsinə və yeni əməkdaşlıq formatlarının yaranmasına töhfə verəcək. Səfir Tamaş Yojef Tormana xaricdəki Azərbaycan Evləri, həftəsonu məktəbləri, Koordinasiya Şuraları kimi fərqli layihələr barədə geniş məlumat verilib. Həmçinin, Azərbaycan diasporunun beynəlxalq informasiya məkanının güclü aktoruna çevrilməsi ilə bağlı fəaliyyəti də qeyd edilib. Görüşdə Azərbaycan və Macarıstan diaspor təşkilatları arasında əlaqələrin möhkəmləndirilməsi və mədəni-humanitar layihələrin təşviqi müzakirə edilib.

Səfir Torman səmimi qəbula görə təşəkkürünü bildirib. O, ölkələr arasında mədəni əlaqələrin genişləndirilməsinin vacibliyini vurğulayıb və Macarıstanın hər zaman Azərbaycanın haqlı mövqeyini dəstəklədiyini deyib. Qonaq xarici ölkələrdəki macar icmaları barədə ətraflı məlumat verib. Səfir qeyd edib ki, ölkələrimiz arasında əməkdaşlıq müxtəlif sahələrdə, o cümlədən diaspor fəaliyyəti sahəsində uğurla davam edir. Xüsusilə gənclər üçün mübadilə proqramlarının artırılması və ortaq layihələrin həyata keçirilməsinin əhəmiyyəti vurğulanıb. TDT üzv və müşahidəçi ölkələrinin diaspor rəsmiləri üçün təşkil olunan II “INTERNSHIP” (təcrübə) proqramı iştirakçılarının ölkəmizə, o cümlədən Qarabağa səfərləri də diqqət mərkəzinə gətirilib.

Tamaş Yojef Torman Azərbaycan dilinə sevgisini və bu dili öyrənmək arzusunu ifadə edib. Səfirə Diasporla İş üzrə Dövlət Komitəsinin dəstəyi ilə çap olunan “Azərbaycan dili” və əcnəbilər üçün hazırlanan “A grammar of contemporary Azerbaijani” (“Müasir Azərbaycan dilinin qrammatikası”) kitabları hədiyyə edilib. Görüşdə qarşılıqlı əməkdaşlığın gələcək perspektivlərinə dair fikir mübadiləsi aparılıb. Hər iki tərəf diaspor sahəsindəki əməkdaşlığın daha da güclənəcəyinə ümidvar olduğunu bildirib.