Macarıstanın Milli siyasət üzrə dövlət katibi ilə diaspor sahəsində əməkdaşlıq müzakirə olunub (FOTO)

Azərbaycan Respublikasının Diasporla İş üzrə Dövlət Komitəsinin sədri Fuad Muradov Budapeştə səfəri zamanı mühüm bir görüş keçirdi. O, Macarıstanın Milli siyasət üzrə dövlət katibi Lörinc Nacsa ilə bir araya gəldi. Görüşdə iki ölkə arasında diaspor sahəsində strateji əməkdaşlıq məsələləri geniş şəkildə müzakirə olundu.

Komitə sədri Fuad Muradov görüş zamanı Prezident İlham Əliyevin rəhbərliyi ilə icra edilən müasir diaspor siyasətinə diqqət çəkdi. O, xaricdə yaşayan azərbaycanlıların təşkili üçün yaradılan Azərbaycan Evləri, həftəsonu Azərbaycan məktəbləri və Koordinasiya Şuraları kimi layihələr haqqında ətraflı məlumat verdi. Qeyd edildi ki, Macarıstandakı Azərbaycan icması, həyata keçirdiyi fəaliyyətlərlə ortaq tarixi köklərə malik olan xalqlarımız arasında ikitərəfli münasibətlərin inkişafına mühüm töhfələr verir.

Lörinc Nacsa Azərbaycan nümayəndə heyətini səmimi salamladı və təcrübə mübadiləsinin əhəmiyyətini vurğuladı. Tərəflər müasir diaspor strategiyası, gələcək perspektiv planlar və əməkdaşlıq platformaları ilə bağlı geniş fikir mübadiləsi apardılar. Görüşdə Azərbaycan Respublikasının Macarıstandakı fövqəladə və səlahiyyətli səfiri Tahir Tağızadə və Budapeştdəki Azərbaycan Evinin rəhbəri İbrahim Səfərli də iştirak edirdilər.