"Mançester Yunayted"in 11 futbolçusu komandadan ayrıla bilər

"Mançester Yunayted" klubu yay transfer pəncərəsində heyətində böyük dəyişikliklər etməyə hazırlaşır. Komandanın rəhbərliyi baş məşqçi Ruben Amorimi dəstəkləməyi və heyətə yeni oyunçular cəlb etməyi planlaşdırır.

Bu transferləri maliyyələşdirmək üçün klub mövcud heyətdən bir çox oyunçunu satmalı olacaq. "The Sun" nəşrinə istinadən verilən məlumata görə, "Mançester Yunayted"in ümumilikdə 11 futbolçusu ilə yollarını ayırması ehtimal olunur.

Komandanı tərk edə biləcək oyunçular arasında yarımmüdafiəçilər Bruno Fernandes, Kazemiro, Kobbi Maynu və Manuel Uqarte yer alır. Müdafiə xəttindən Harri Maquayr və Tirell Malasiyanın da satılması gözlənilir. Hücumçular Ceydon Sanço, Markus Reşford, Coşua Zirkze və Rasmus Hoylund kimi adların da siyahıda olduğu bildirilir.

Həmçinin, klubun qapıçısı Altay Bayındırın da azad agent kimi buraxılması ehtimal edilir. Xəbərdə deyilir ki, "Mançester Yunayted" gələn yay bir neçə yarımmüdafiəçi, yeni qapıçı və bir cinah oyunçusu transfer etməyi planlaşdırır.