Masallıda yol qəzası: sərnişin ölüb

Masallı rayonunda ağır yol-nəqliyyat hadisəsi baş verib, bir nəfər sərnişin həyatını itirib. Qəza dekabrın 1-i günorta saat 12 radələrində Masallının Həsənli kəndi ərazisindən keçən yolda qeydə alınıb. Hadisə zamanı dörd nəfər yaralanıb, lakin onlardan biri aldığı xəsarətlərdən xəstəxanada vəfat edib. Bu faciəvi hadisə ilə bağlı qanuni araşdırmalara başlanılıb və cinayət işi açılıb.

Qəza 1990-cı il təvəllüdlü Fərmudə Hüseynovanın idarə etdiyi “Nussan Sunny minik” markalı avtomobillə hərəkət edərkən baş verib. Sürücü Həsənli kəndi ərazisində nəqliyyat vasitəsi üzərində idarəetməni qəfildən itirib. Nəticədə avtomobil aşıb. Sürücü F.Hüseynova ilə yanaşı, avtomobildə olan sərnişinlər - 1975-ci il təvəllüdlü İsmayılova Gülşən İsa qızı, 1985-ci il təvəllüdlü Nuriyeva Nuriyə Rasim qızı və 1961-ci il təvəllüdlü Vəlişova Sevda İsa qızı müxtəlif dərəcəli bədən xəsarətləri alıblar. Bütün yaralılar təcili olaraq Masallı rayon Mərkəzi xəstəxanasına yerləşdiriliblər.

Təəssüf ki, sərnişin S.Vəlişovanı xilas etmək mümkün olmayıb. 1961-ci il təvəllüdlü Sevda Vəlişova aldığı xəsarətlərdən rayon mərkəzi xəstəxanasında dünyasını dəyişib. Faktla bağlı Masallı Rayon Polis Şöbəsinin İstintaq Bölməsində araşdırmalar davam edir. Azərbaycan Respublikası Cinayət Məcəlləsinin 263.2-ci maddəsi ilə yol qəzası faktı üzrə cinayət işi başlanıb.