Müxtəlif dövrlərdə xəstəliklə bağlı əsgərlikdən möhlət alanlar yenidən yoxlanılır - EKSKLÜZİV

Səfərbərlik və Hərbi Xidmətə Çağırış üzrə Dövlət Xidməti (SHXÇDX) müxtəlif illərdə hərbi xidmətə çağırışla bağlı möhlət hüququ əldə etmiş şəxslərin sağlamlıq vəziyyətini yenidən yoxlayır. Bu təkrar yoxlamalar uzun müddət əvvəl tibbi səbəblərlə əsgərlikdən müvəqqəti azad edilmiş şəxslərin hazırkı yararlılıq səviyyəsini dəqiqləşdirmək məqsədi daşıyır.

Bu barədə məlumatı SHXÇDX-nin Təşkilati Nəzarət Baş İdarəsinin rəisi, polkovnik Əziz Hidayev vətəndaş cəmiyyətinin üzvləri ilə keçirdiyi görüş zamanı açıqladı. O, xüsusilə son bir il ərzində aparılan işlərə diqqət çəkdi.

Polkovnik Hidayev qeyd etdi ki, müxtəlif dövrlər üzrə hərbi xidmət çağırışı ilə əlaqədar müəyyən xəstəliklərə görə möhlət hüququ almış şəxslər yenidən təkrar tibbi yoxlanışdan keçirilir. Yoxlamaların nəticəsi olaraq, səhhətində ciddi problem aşkarlanmayan şəxslər dərhal hərbi xidmətə cəlb olunur. Bu prosedurlar ordunun heyətinin formalaşdırılması və hərbi xidmətə yararlılıq statusunun aktuallaşdırılması üçün həyata keçirilir.