"Nar" QHT-lərlə KSM sahəsində əməkdaşlığın gücləndirilməsinə dəstək verir

Sərfəli mobil operator "Nar" korporativ sosial məsuliyyət (KSM) sahəsində milli təcrübənin inkişafına dəstək göstərir. Şirkət bu məqsədlə QHT-lər ilə əməkdaşlıq imkanlarının müzakirə olunduğu əhəmiyyətli bir konfransda iştirak etdi. Tədbir "Özəl sektorun KSM siyasətində QHT-lərin iştirakı: təcrübə və yanaşmalar" adı altında keçirildi. Bu konfrans şirkətlərin KSM siyasəti ilə Qeyri-Hökumət Təşkilatları arasında səmərəli əlaqələrin qurulmasını müzakirə etmək üçün əsas platforma rolunu oynadı. Tədbiri Azərbaycan Milli QHT Forumu və "Prioritet" Sosial-İqtisadi Araşdırmalar Mərkəzi təşkil edib, QHT-lərə Dövlət Dəstəyi Agentliyi isə bu işə maliyyə yardımı göstərib.

Üç gün davam edən konfransa aparıcı şirkətlərin, bankların, biznes assosiasiyalarının və müxtəlif sahələr üzrə ixtisaslaşmış QHT nümayəndələrinin qatılması diqqət çəkirdi. Çıxışlarda mütəxəssislər KSM-in yalnız sosial aksiyalardan ibarət olmadığını qeyd etdilər. Onlar vurğuladılar ki, KSM biznes idarəetməsinin strateji hissəsidir. Konfrans çərçivəsində "Nar"ın İctimaiyyətlə əlaqələr və korporativ ünsiyyət departamentinin direktoru Hökumə Kərimova şirkəti təmsil etdi. O, Nar-ın KSM yanaşması, QHT-lərlə qurulan əməkdaşlıq mexanizmləri və layihələrin necə monitorinq edildiyi barədə təqdimatla çıxış etdi. Kərimova həmçinin gələcək əməkdaşlıq imkanlarına dair fikirlərini bölüşdü.

"Nar" KSM fəaliyyətini uzunmüddətli sosial dəyər yaratmağa yönəlmiş strateji istiqamət kimi inkişaf etdirir. Mobil operator təhsilin inkişafı, inklüzivlik, milli-mədəni irs və vətənpərvərlik mövzularında davamlı layihələrə dəstək verir. Şirkət sosial təşəbbüslərin regionlarda genişləndirilməsinə xüsusi önəm verir. "Nar" QHT-lər ilə əməkdaşlığı sosial layihələri daha səmərəli həyata keçirmək üçün mühüm tərəfdaşlıq modeli sayır. Belə tədbirlərin keçirilməsi Azərbaycanda korporativ sosial məsuliyyət mədəniyyətinin dərinləşməsinə və güclənməsinə şərait yaradır.