Peruda torpaq sürüşməsi nəticəsində 13 nəfər ölüb

Perunun şərq hissəsində baş verən təbii fəlakət nəticəsində sərnişin daşıyan çay gəmisi batıb. Hadisəyə səbəb torpaq sürüşməsi olub və ilkin məlumatlara görə, azı 13 nəfər həlak olub. Bu faciənin təfərrüatları Ukayali departamentinin regional səhiyyə idarəsi tərəfindən açıqlanıb.

İdarənin ilkin hesabatında bildirilir ki, Bakı vaxtı ilə səhər 3:00-a (yerli vaxtla 18:00) olan məlumata görə, 13 nəfərin öldüyü təsdiqlənib. Həlak olanlar arasında həm böyüklər, həm də uşaqlar var idi. Hadisə baş verəndən sonra 28 nəfər itkin düşmüş hesab edilir, lakin hakimiyyət orqanları itkin düşənlərin sayının dəyişə biləcəyini qeyd edirlər. Xilasetmə əməliyyatları nəticəsində ümumilikdə 16 nəfər xilas edilib.

RPP radiostansiyasının verdiyi məlumata görə, təxminən 50 nəfəri daşıyan qayıq Pukalpa şəhərindən yola çıxmışdı. Gəmi Ukayali çayı boyunca yerləşən şəhərlərə sərnişinlər daşıyırdı. Qəza İpariya bölgəsində, gəmi dayanarkən baş verib. Bu zaman yuxarıdan düşən qaya parçası birbaşa nəqliyyat vasitəsinin üzərinə düşüb. Qeyd edilir ki, həmin vaxt ərazidə başqa bir gəmi də lövbər salmışdı, lakin ilkin məlumatlara görə, ikinci gəmi boş idi.