Rubio NATO-nun xarici işlər nazirlərinin toplantısına qatılmayacaq

ABŞ Dövlət katibi Marko Rubio dekabrın 3-də Brüsseldə keçiriləcək NATO ölkələrinin xarici işlər nazirlərinin görüşündə iştirak etməməyi planlaşdırır. "Reuters" agentliyi öz mənbələrinə istinadən məlumat verir ki, bu qərar diplomatik dairələrdə nadir hal kimi qiymətləndirilir. Belə yüksək səviyyəli bir sammitdə Dövlət katibinin olmaması diqqəti cəlb edir.

Agentliklə danışan mənbələr bildirib ki, Dövlət Departamentinin rəhbəri əvəzinə həmin toplantıda onun müavini Kristofer Landau iştirak edə bilər. Lakin Marko Rubionun görüşə niyə qatılmamağı planlaşdırdığı haqqında hər hansı bir açıqlama verilməyib. NATO XİN sammitində dövlət katibinin iştirak etməməsi "son dərəcə nadir hal" sayılır. Bu məsələ sonuncu dəfə 2017-ci ildə, vəzifəni Reks Tillerson icra edərkən gündəmə gəlmişdi. Həmin vaxt görüş onun qrafikinə uyğunlaşdırmaq üçün təxirə salınmışdı.