Rusiya Ukrayna paytaxtına və Kiyev vilayətinə təxminən 36 raket və 600 dron atıb

Rusiya qoşunları Ukraynanın paytaxtı Kiyevə və Kiyev vilayətinə genişmiqyaslı hücum həyata keçirib. Bu hücumda təxminən 36 raket və 600 dron istifadə edilib. Ukrayna Prezidenti Volodimir Zelenski bu barədə məlumatı sosial şəbəkələrdə yayıb.

Prezidentin sözlərinə görə, hücumların əsas hədəfləri ölkənin enerji təchizatı və **mülki obyektlər** olub. Atılan zərbələr nəticəsində yaşayış evlərinə ciddi ziyan dəyib və bir çox ərazidə yanğınlar baş verib. Bu hücum nəticəsində hazırda onlarla insanın yaralandığı və üç nəfərin həlak olduğu bildirilir.

V.Zelenski ölkənin müdafiəsini gücləndirmək üçün davamlı səylərin vacibliyini vurğulayıb. O, Hava Hücumundan Müdafiə Sistemlərinin (HHM) kifayət qədər raket və digər zəruri resurslarla təmin edilməsini istəyib. Ukrayna rəhbəri qeyd edib ki, müdafiəni təmin etmək və Rusiyaya təzyiq göstərmək üçün lazım olan hər şeyin təmin edilməsi məqsədilə bir gün belə vaxt itirmədən çalışmalıyıq. Prezident əlavə edib ki, əgər Moskva dron və raket zərbələrindən əl çəkmək istəmirsə, Avropanın dondurulmuş aktivlərlə bağlı qərar qəbul etməsinin vaxtı çatıb. O, müharibəni bitirmək üçün atılmalı olan addımlar barədə bütün tərəfdaşlarımızla danışmağın zəruri olduğunu bildirib.