Tibbi sığorta ilə bağlı qeyri-formal məşğul şəxslərin necə müəyyənləşdiriləcəyi açıqlanıb

Maliyyə naziri Sahil Babayev Milli Məclisin iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı icbari tibbi sığorta ilə bağlı mühüm məlumatları açıqlayıb. O bildirib ki, ölkə əhalisinin minimum 95%-i sığorta xərclərindən tam şəkildə əhatə olunacaqdır. Dövlət uşaqlar, pensiyaçılar, əlilliyi olan şəxslər, əmək qabiliyyəti olmayanlar və işsizlər daxil olmaqla, təxminən 7.3-7.5 milyon insanın sığortasını öz üzərinə götürəcək. Bu geniş əhatə dairəsi üçün növbəti ilin büdcəsində 900 milyon manat vəsait ayrılıb.

Nazir əlavə edib ki, təxminən 2 milyon vətəndaşımız muzdlu əmək müqaviləsi ilə çalışır. Onların sığortası əmək müqaviləsinin şərtlərinə uyğun olaraq işçi və işəgötürən tərəfindən qarşılanır. Fərdi sahibkarlar da öz sığortalarını özləri ödəyirlər. Sığorta əhatə dairəsindən kənarda qalan yeganə qrup işləyən, gəliri olan, lakin bu gəliri gizlədən, yəni qeyri-formal məşğul olan şəxslərdir. Sahil Babayev qeyri-formal fəaliyyətin qanunvericiliklə qadağan edildiyini xatırladıb. O deyib ki, yalnız qanunvericiliklə qadağan edilmiş şəkildə fəaliyyət göstərən insanlar sığortalarını özləri ödəməli olacaqlar. Bu, əhalinin sosial sığorta ilə əhatə olunması istiqamətində növbəti, güzəştli və müsbət bir addımdır.

Bəs qeyri-formal məşğul şəxslər necə müəyyən ediləcək? Nazir bildirdi ki, bunun üçün xüsusi qaydalar tətbiq olunacaq, onların müəyyən edilmə meyarları da elektron şəkildə olacaqdır. Bu sistem fərdiləşmiş məlumat əsasında, təqdim olunan şəxsiyyət vəsiqəsinin nömrəsinə görə hər bir insanın hansı kateqoriyaya düşdüyünü müəyyənləşdirəcək. Müvafiq kateqoriyaya düşməyən insanların gəlir mənbəyi soruşulacaq. Bu insanlar sığortadan kənar qalmır. Əksinə, onlara imkan yaradılır ki, yalnız bir dəfə sığorta haqqı ödəməklə, istənilən məbləğdə olan tibbi xidmətdən yararlansınlar.