Tramp Konqo DR və Ruandanın rəhbərlərini sülh sazişini imzalamaq üçün qəbul edəcək

ABŞ Prezidenti Donald Tramp dekabrın 4-də Ruanda və Konqo Demokratik Respublikasının (KDR) prezidentləri Pol Kaqame və Feliks Çisekedini Ağ Evdə qəbul edəcək. Bu görüş tarixi sülh və iqtisadi sazişin imzalanması məqsədi daşıyır.

Ağ Evin mətbuat katibi Kerolayn Livitt bildirib ki, Prezident Tramp sazişin əldə olunmasında vasitəçi kimi çıxış edib. Livittin sözlərinə görə, cümə axşamı baş tutacaq bu tədbir, uzunmüddətli gərginliyə son qoymaq yolunda əhəmiyyətli addım sayılır. Diplomatik səylər Mərkəzi Afrikada sabitliyi bərpa etməyə yönəlib. Bu sazişin tam qüvvəyə minməsi iki ölkə başçısının Vaşinqtonda keçirəcəkləri görüşün nəticəsində həyata keçəcək.

Konqo Demokratik Respublikası və Ruandanın xarici işlər nazirləri artıq iyunun 27-də Vaşinqtonda ilkin sülh sazişini imzalamışdılar. Bu prosesdə ABŞ və Qətər vasitəçilik edib. Tərəflər arasındakı gərginlik Konqonun şərqindəki dörd il əvvəl başlayan böhranla əlaqəlidir. Bu böhran M23 kimi tanınan üsyançı qruplaşmaların fəallığının artması ilə başlayıb. Üsyançılar KDR-in şərqində, iki vilayətin paytaxtı daxil olmaqla, 100-dən çox şəhər və yaşayış məntəqəsini işğal ediblər. Onlar nəzarət etdikləri ərazilərdə hökumətə tabe olmayan yerli idarəetmə orqanları yaradıblar. Konqo rəsmiləri iddia edirlər ki, M23 üsyançılarının arxasında Ruanda hökuməti dayanır. Bu görüş, tərəflərarası münaqişəni siyasi yolla həll etmək üçün böyük bir fürsət yaradır.