"Yahoo" bir ayda Azərbaycandakı bazar payının 28 %-ni itirib

Statcounter agentliyinin son hesabatına görə, 2023-cü ilin noyabr ayında Azərbaycanda axtarış sistemlərinin bazar payında əsas dəyişikliklər qeydə alınıb. Bütün platformalarda (kompüter, mobil cihazlar və planşetlər) "Google" axtarış sistemi bazarın ən böyük hissəsini tutmağa davam edir, lakin onun payında azalma müşahidə olunub. Google-un bazar payı 79,38% təşkil etsə də, bu rəqəm əvvəlki dövrlərə nisbətən aşağıdır. Bu göstərici oktyabr ayı ilə müqayisədə 2,54 faiz bəndi, 1 il əvvəlin göstəricisi ilə müqayisədə isə 4,8 faiz bəndi azalıb.

Google hələ də bazarda dominant olsa da, rəqiblərin payı yavaş-yavaş artır. İkinci pillədə "Yandex"in mövqeyi güclənib. Yandex-in bazar payı bu müddət ərzində 18,34%-ə çatıb. Bu, Yandex üçün ciddi artım deməkdir; axtarış sistemi ay ərzində 2,71 faiz bəndi, illik isə 4,31 faiz bəndi artım göstərib. Digər rəqiblərdən "Bing" 1,5% paya sahibdir. Bing-in bazar payı aylıq 0,01 faiz bəndi, illik isə 0,53 faiz bəndi artaraq sabit bir vəziyyətini qoruyub. Dördüncü sırada qərarlaşan "DuckDuckGo"nun payı isə 0,4% olub. DuckDuckGo ay ərzində 0,08 faiz bəndi azalsa da, illik müqayisədə 0,05 faiz bəndi artım əldə edib.

İlk beşliyi bağlayan "Yahoo" isə ən böyük itkilərlə üzləşib. Yahoo-nun bazar payı ay ərzində 0,12 faiz bəndi azalaraq cəmi 0,31% təşkil edib. Bu azalma illik göstəricilərdə də eyni miqdarı təşkil edir. Ən diqqətçəkən məqam isə bu axtarış sisteminin bazar payının cəmi bir ay ərzində 28% kiçilməsidir. Bu rəqəmlər göstərir ki, Azərbaycan bazarında rəqabət dəyişir; Yandex kimi rəqiblər paylarını artırarkən, kiçik oyunçular (Yahoo) öz mövqelərini sürətlə itirirlər.