Yaxın gələcəkdə QİÇS-in ekspress testlərlə müəyyən edilməsi mümkün olacaq

Səhiyyə nazirinin müavini Nadir Zeynalov bildirib ki, QİÇS sahəsində gözlənilən ən böyük yenilik diaqnostikanın davamlı, ucuz və ekspress testlərlə mümkün olmasıdır. O, jurnalistlərə açıqlamasında qeyd edib ki, artıq bu məsələ gündəmdədir.

Nazir müavininin sözlərinə görə, digər bir çox infeksion xəstəliklərdə olduğu kimi, İİV-in diaqnostikasında da cəmi 15 dəqiqəyə nəticə almaq mümkün olacaq. Bu ekspress testlər artıq əlçatan və sürətli nəticə verən bir nailiyyət sayılır. İkinci əsas inkişaf isə QİÇS-in müalicəsində istifadə edilən dərmanların yan təsirlərinin daha da azalması ilə bağlıdır. Bu dərmanları davamlı qəbul edən şəxslərdə müalicə prosesinin daha yüngül keçməsi də nəzərdə tutulur.

Nadir Zeynalov bu yeniliklərin hələ yaxın perspektivdə reallaşmayacağını, lakin gələcək üçün proqnozlaşdırıldığını bildirib. Uzun müddət sonra QİÇS üçün ya tam sağalma ilə nəticələnən müalicə üsulu tapılacaq və tətbiq olunacaq, ya da xəstəlik üçün effektiv peyvənd hazırlanacaq. Bu inkişaflar xəstəliyə son qoymağa imkan verəcək. Hələlik bu istiqamətdə işlər davam edir.