Bu deputatların 80-dən çox yaşı var - FOTO

Azərbaycanın Milli Məclisində yaşlı məmurlar kimi, təcrübəli deputatlar da yer alır. Ölkə parlamentinin 30-dan çox üzvü rəsmi pensiya yaşını keçib. Bu deputatların dördü isə xüsusilə fərqlənir, çünki onlar ömürlərinin səkkizinci onilliyini, yəni 80 yaşını tamamlayıblar. Bu vətəndaşlar uzun illərdir ki, dövlət idarəçiliyində təmsil olunur və Milli Məclisin fəaliyyətində mühüm yer tuturlar.

Ziyad Səmədzadə hazırda Milli Məclisin ən qocaman deputatı sayılır. O, 25 iyun 1940-cı ildə Bakıda anadan olub və hazırda 85 yaşındadır. Tanınmış akademik olan Səmədzadə bir çox dövlət və hökumət vəzifələrində çalışıb. O, müstəqillik illərində müxtəlif dövrlərdə 5 dəfə deputat seçilərək uzun xidmət müddəti ilə yadda qalıb. Polad Bülbüloğlu da 80 yaşlı deputatlardandır. 4 fevral 1945-ci ildə dünyaya gələn müğənni-deputat səkkiz ay əvvəl 80 illik yubileyini qeyd edib. O, ötən il keçirilən parlament seçkilərində 124 saylı Şuşa -Ağdam-Xocavənd seçki dairəsindən Milli Məclisə üzv seçilib.

Parlamentin digər veteranları Eldar İbrahimov və Mixail Zabelindir. Səksən yaşlı Eldar İbrahimov ardıcıl 7 çağırış Milli Məclisin deputatı olub. O, hakim Yeni Azərbaycan Partiyasının üzvüdür və hazırda Milli Məclisin İntizam komissiyasına rəhbərlik edir. Bu il martın 19-da 80 yaşını qeyd edən Mixail Zabelin isə 30 ildir ki, deputat mandatı daşıyır. O, Azərbaycandakı Rus İcmasının sədridir. Rus əsilli Zabelin Milli Məclisdə çıxışlarında az görünsə də, ardıcıl 7 dəfə deputat seçilməyi bacarıb. Bu dörd şəxs Azərbaycan siyasətinin ən yaşlı və ən təcrübəli simaları hesab olunur.