Məqsədimiz dünya standartlarına uyğun model yaratmaqdır - "Bio Garden" rəhbəri

Sahibkar Ehtibar Nuriyev bildirib ki, 18 ildir ailəsi ilə birlikdə səkkiz hektar ərazini əhatə edən "Bio Garden" təsərrüfatının yaradılması üzərində işləyirlər. Onun sözlərinə görə, əsas məqsəd dünya standartlarına uyğun nümunəvi kənd təsərrüfatı modeli və bağçılıq konsepsiyası formalaşdırmaqdır. Bu layihə təbii landşaftı, flora müxtəlifliyini və kənd həyatının gözəlliklərini insanlara təqdim etməyi hədəfləyir.

Bu böyük layihə üç əsas hissədən ibarətdir və hər bir hissə həm nümayiş, həm də idarəetmə baxımından yüksək səviyyədə təşkil olunub. Birinci layihə rentabelli təsərrüfat modelini əhatə edir. Bu bölmədə torpağın hər qarışı iqtisadi göstəricilər baxımından səmərəli istifadənin əyani nümunəsi kimi təqdim olunur. Məqsəd, dünya miqyasında tətbiq edilən müasir təsərrüfatçılıq prinsiplərinin real modelini göstərməkdir. İkinci layihə isə dəyər zəncirinin qurulması ilə bağlıdır. Ailə fermer təsərrüfatı modeli yaradılır, burada məhsulun tarladan son məhsula qədər bütün mərhələlərinin necə səmərəli idarə olunduğu nümayiş etdirilir. Bu, kənd təsərrüfatının davamlı inkişafı üçün vacib olan praktiki bir nümunədir. Üçüncü layihə kənd həyatının turizmə inteqrasiyası, yəni aqroekoturizm məkanıdır. Bu hissə yaşıl turizmin tərkib hissəsi sayılır. Burada ziyarətçilərə kənd həyatı, kənd təsərrüfatı imkanları və ekologiyaya əsaslanan təsərrüfatçılıq dolğun şəkildə çatdırılır.

Bu model dünyanın fərqli ölkələrindəki kənd təsərrüfatı modellərinin sintezindən yaranıb; layihədə torpağın infrastrukturundan ustalıqla istifadə edilib. Sahibkar gec yetişən meyvələrin keçidlərinə xüsusi önəm verdiklərini qeyd edir. Ərazi zəfəran, badam, innab və başqa nadir bitkilərlə zəngindir. Agroturizm çətin sahədir, çünki açıq istehsal sahəsi olmaqla yanaşı, təbiət faktorundan da asılıdır. Burada əsas məqsəd orqanik məhsulların yetişdirilməsi zamanı nələrə diqqət yetirildiyini, torpağın və bitkilərin necə qorunduğunu, həmçinin məhsuldarlığın artırılması üçün hansı üsulların istifadə olunduğunu əyani şəkildə göstərməkdir. Layihənin əsas hədəflərindən biri ölkəmizin kənd təsərrüfatı potensialını və kənd həyatının gözəlliklərini həm yerli, həm də xarici turistlərə göstərməkdir.

"Bio Garden" ə giriş ödənişlidir. Azərbaycan vətəndaşları 5 manat, xarici vətəndaşlar isə 10 manat ödəyirlər. Bu ödənişlə turistlər səkkiz hektarlıq ərazidə üç saat ərzində sərbəst gəzə bilirlər. Ziyarətçilər istədikləri qədər meyvə dada, orqanik qiymətlərlə məhsul yığa və təsərrüfatda hazırlanan təbii məhsullardan ala bilərlər. Ərazidə restoran və kafe xidmətləri də mövcuddur. Turistlər təbiətdə balıq tuta bilər, eləcə də təbii toyuqların kəsimi və onlardan yeməklərin hazırlanması üzrə ustad dərslərində iştirak etmək imkanı qazanırlar. Bundan başqa, uşaqlar üçün geniş əyləncə zonaları və müxtəlif interaktiv fəaliyyətlər də təşkil edilib. Bütün bunlar "Bio Garden" in dünya standartlarına uyğun model olma ambisiyasını tamamlayır.