Pambıq istehsalı artıb - Bu rayonlar liderdir

Azərbaycanda pambıq sənayesində ciddi artım qeydə alınıb. Dövlət Statistika Komitəsinin məlumatına görə, bu ilin yanvar-sentyabr aylarında ölkədə 48,1 min ton pambıq mahlıcı istehsal edilib. Bu rəqəm ötən ilin eyni dövrü ilə müqayisədə 33 faiz çoxdur. İstehsal həcmi pambıq ipliyi sahəsində də yüksəlib.

Yanvar-oktyabr aylarında 17,56 min ton iplik istehsalı 2024-cü ilin eyni dövrü ilə müqayisədə 23 faiz artım deməkdir. Liberal İqtisadçılar Mərkəzinin sədri, kənd təsərrüfatı üzrə ekspert Akif Nəsirli bu artımın əsas səbəblərini açıqlayıb. O bildirib ki, Azərbaycanda pambıq istehsalının yüksəlməsi əsasən əkin sahələrinin genişləndirilməsi, fermerlərə göstərilən dəstəyin güclənməsi və pambıq emalı sənayesinin inkişafı ilə bağlıdır. Bu sahədəki inkişaf pambıq emalı sənayesinin önəmli dərəcədə böyüdüyünü göstərir.

Akif Nəsirli son illərdə pambıqçılığın yenidən prioritet sahəyə çevrildiyini vurğulayıb. Həm dövlət qurumları, həm də tədarük şirkətləri bu istiqamətdə sıx fəaliyyət göstərir. Artıma təsir edən əsas amillər arasında suvarma imkanlarının genişləndirilməsi, keyfiyyətli toxum təminatı və sahələrdə aqrotexniki xidmətlərin artırılması yer alır. Pambıqdan hazırlanan lif, iplik və parça istehsalında artım qeydə alındığı üçün fermerlərin məhsullarına olan tələbat da yüksəlir. Bu vəziyyət daxili bazarda sənaye tələbatının artması ilə birbaşa bağlıdır.

Ölkədə ən çox pambıq istehsal olunan bölgələr Saatlı, Sabirabad, Ağcabədi və Bərdə rayonlarıdır. Bu bölgələr ənənəvi pambıqçılıq zonaları sayılır, həm torpaq, həm də iqlim şəraiti bu sahənin inkişafı üçün daha əlverişlidir. Digər rayonlarda da əkin sahələri artırılıb, lakin əsas yük məhz bu bölgələrin üzərinə düşür. Fermerlərə müxtəlif imkanlar yaradılır. Onlara subsidiyalar verilir, tədarük məntəqələri genişləndirilir, texnika və gübrə təminatı yaxşılaşdırılır.

Pambıqçılıq sahəsinin inkişafı üçün infrastruktur işləri də davam edir. Suvarma kanalları yenilənir, sahələrin bərpası və münbitləşdirilməsi məqsədi ilə xüsusi layihələr həyata keçirilir. Emal müəssisələrinin sayının çoxalması fermerlərə məhsulları vaxtında və stabil qiymətlə satmaq üçün şərait yaradır. Bu addımlar pambıqçılığın ildən-ilə artmasına və kənd təsərrüfatı ilə məşğul olan insanların bu sahəyə daha çox maraq göstərməsinə səbəb olur. Bu dəstək proqramları kənd təsərrüfatı sektorunu gücləndirir və milli istehsalat zəncirini tamamlayır.