Yaşayış minimumu 15 manat artdı

Milli Məclis 2026-cı ilin dövlət büdcəsi zərfinə daxil olan iki vacib qanun layihəsini ikinci oxunuşda qəbul etdi. Bunlar "Azərbaycan Respublikasında 2026-cı il üçün yaşayış minimumu haqqında" və "Azərbaycan Respublikasında 2026-cı il üçün ehtiyac meyarının həddi haqqında" sənədləridir.

Parlamentin plenar iclasında aparılan müzakirələr zamanı bildirildi ki, 2026-cı ildə Azərbaycanda yaşayış minimumu və ehtiyac meyarının hər ikisinin 300 manat olması planlaşdırılır. Bu, 2025-ci ilin göstəricisi ilə müqayisədə 15 manat, yəni 5,3 % daha çoxdur.

Qəbul edilən sənədə görə, yaşayış minimumu müxtəlif əhali qrupları üçün fərqli şəkildə müəyyən edildi. Əmək qabiliyyətli əhali üçün bu məbləğ 317 manat təşkil edəcək. Pensiyaçılar üçün minimum 245 manat, uşaqlar üçün isə 260 manat müəyyənləşdirilib.

Müzakirələr bitdikdən sonra hər iki qanun layihəsi səsverməyə çıxarıldı. Milli Məclis sənədləri ikinci oxunuşda qəbul etməklə 2026-cı il üçün sosial standartları təsdiqləmiş oldu.