ABŞ helikopterləri İranda köçəri tayfalar tərəfindən vurulub
İran-ABŞ gərginliyində yeni inkişaf yaşanıb. ABŞ-a məxsus iki "Black Hawk" helikopteri İranın dağlıq ərazisində yaşayan köçəri tayfalar tərəfindən vurulub. Bu barədə İran İslam İnqilabı Keşikçiləri Korpusunun (SEPAH) "Gerçək vəd - 4" əməliyyatı ilə bağlı 55 nömrəli bəyanatında bildirilib. SEPAH bəyanatında İranın tayfalarına təşəkkür edib. Xatırladaq ki, bundan əvvəl İranın cənubunda ABŞ-a məxsus F-15 hərbi təyyarəsi vurulmuş, pilotlardan birinin axtarışı davam edirdi.
Ərdoğan HƏMAS nümayəndə heyətini qəbul edib
Türkiyə Prezidenti Rəcəb Tayyib Ərdoğan İstanbulda HƏMAS Siyasi Bürosunun nümayəndə heyəti ilə görüşüb. Türkiyə Prezident Administrasiyasının Kommunikasiya İdarəsinin məlumatına görə, görüşdə Qəzzadakı son vəziyyət müzakirə olunub. Eyni zamanda, Pakistan və Misirin xarici işlər nazirləri də telefon danışığı apararaq Yaxın Şərqdə gərginliyin azaldılması məsələsini müzakirə ediblər.
Tramp Alkatras həbsxanasının yenidən açılmasını istəyir
ABŞ Prezidenti Donald Tramp 2027-ci maliyyə ili üçün təklif etdiyi büdcə çərçivəsində məşhur Alkatras həbsxanasının yenidən açılması üçün 152 milyon dollar vəsait tələb edib. San-Fransiskodakı Qızıl Darvaza Körpüsü yaxınlığında yerləşən və "Qaya" olaraq da tanınan bu məkan, bir vaxtlar Amerikanın ən pis şöhrətli məhkumlarını saxlayan federal həbsxana olub.
Ukraynaya ABŞ nümayəndə heyətinin səfəri gözlənilir
Ukrayna Prezidenti Ofisinin rəhbəri Kirill Budanov "Bloomberg"ə açıqlamasında bildirib ki, ABŞ Prezidentinin elçisi Stiv Uitkoff və sahibkar Cared Kuşnerin rəhbərlik etdiyi Amerika nümayəndə heyəti Pasxa bayramından sonra - 12 apreldən sonra Kiyevə səfər edə bilər.
"Mançester Siti" "Liverpul"u darmadağın edib, Azərbaycan cüdoçuları uğur qazanıb
İngiltərə Federasiya Kubokunda 1/4 final mərhələsində "Mançester Siti" doğma meydanda "Liverpul"u 4:0 hesabı ilə məğlub edərək yarımfinala yüksəlib. Erlinq Haaland üç qol vurub. Azərbaycanda isə Gəncədə cüdo üzrə yeniyetmələr arasında Avropa Kubokunun ilk günü başa çatıb. Azərbaycan təmsilçiləri 1 qızıl, 4 gümüş və 8 bürünc olmaqla, ümumilikdə 13 medal qazanıblar.