Suriya Prezidenti Əhməd Şara: 4 İldən Sonra Ölkədə Ümumi Seçkilər Keçiriləcək

Suriya Prezidenti Əhməd Şara Qətərin paytaxtı Dohada təşkil edilən, “Fəaliyyətdə Ədalət: Vədlərdən Tərəqqiyə” mövzusunda 23-cü Doha Forumunda ölkənin siyasi gələcəyi haqqında mühüm açıqlamalar verib. Şara, Suriyanın hazırda tətbiq edilən beş illik keçid dövrünün başa çatmasından sonra, yəni dörd il sonra ümumi seçkilərə gedəcəyini rəsmi şəkildə elan edib. Forumdakı çıxışında Şara, 8 Dekabr 2024-cü il tarixindən bu yana İsrailin Suriyaya qarşı həyata keçirdiyi hərbi təcavüzə də toxunub. O, İsrailin minlərlə hava zərbəsi və yüzlərlə quru sərhəd pozuntusu törətdiyini, o cümlədən son olaraq Şamın ətrafındakı Beyt Cində çoxlu mülki şəxsin ölümü ilə nəticələnən hücumun olduğunu bildirib. Suriya dövlət başçısı beynəlxalq tərəfdaşlarla birlikdə İsrailin 8 dekabrdan sonra zəbt etdiyi ərazilərdən geri çəkilməsi üçün çalışdıqlarını qeyd edib. Bu tələb digər ölkələr tərəfindən geniş dəstək görür.

Şara İsrail ilə davam edən danışıqlarda ABŞ-ın da iştirak etdiyini xüsusi vurğulayıb. O, 1974-cü il razılaşmasının 50 il müddətində qüvvədə qaldığını xatırlatdı. Hazırkı müzakirələrdə əsas məsələ İsrailin tələb etdiyi silahsızlaşdırılmış zonanın statusudur. Şara narahatlıq ifadə edərək, əgər bu bölgədə ordu və asayiş qüvvələri olmayacaqsa, ərazinin mühafizəsini kimin təmin edəcəyini soruşub. İsrailin daimi olaraq özünə qarşı hücumların təşkil edilməsi ehtimalından narahat olduğunu bildirən Şara, ölkələrin İsrailin 8 Dekabr 2024-cü il tarixindən əvvəlki mövqelərinə çəkilməsini dəstəklədiyini bildirib. Onun fikrincə, silahsızlaşdırılmış bölgə ilə bağlı razılaşmaların uğursuz olması Suriyanı təhlükəli bir mərhələyə sala bilər.

Daxili siyasətə gəlincə, Şara ölkədə tətbiq edilən keçid proseslərində heç bir hökumətin xalqın bütün komponentləri ilə tam razılığa nail ola bilmədiyini söylədi. Bununla belə, o, son bir ildə qətiyyən qəbul edilməyən problemlərin yaşandığını, lakin günahkarların mühakimə olunduğunu qeyd edib. Prezident Şara Suriyada əhalinin həyat keyfiyyətini artırmaq üçün görülən işləri qeyd edərək, xüsusilə elektrik təminatında əldə olunan irəliləyişlərə diqqət çəkdi. Onun sözlərinə görə, əvvəllər gündə cəmi 1,5 saat elektrik verildiyi halda, indi bu müddət 12-14 saata yüksəlib. Şara ilin sonuna doğru Suriyanın elektrik təchizatı sahəsində tamamilə öz-özünə yetərlilik səviyyəsinə çatacağını bəyan etdi.

Əhməd Şara Suriyanın gələcəyinin fərdlərə deyil, möhkəm qurumlara əsaslanan bir idarəetmə modeli ilə qurulduğunu vurğulayıb. O, hökumətdə təmsilçiliyin ləyaqət meyarı ilə təmin edildiyini bildirib. Milli dialoq konfransından sonra qəbul edilən müvəqqəti konstitusiya tənzimləməsi ilə özünə beş illik səlahiyyət verildiyini ifadə edən Şara, Suriyanın qurumlar üzərindən inşa edilən, seçkilərə dayanan bir ölkə olacağını təkrarlayıb. İllərlə davam edən təcrid və iqtisadi blokadadan sonra Suriyanın ən yaxşı şərtlərə doğru irəlilədiyini, devrilmiş rejimin getməsinin milyonlarla insan tərəfindən qeyd edildiyini söyləyib. O, iqtisadi bərpanı sürətləndirmək məqsədilə ABŞ ilə Sezar Qanunu sanksiyalarının ləğvi üçün əlaqələrin davam etdiyini, həmçinin keçid dövründə cinayətlərin araşdırılması üçün xüsusi komitələr yaradıldığını da əlavə edib.