Google Chrome Süni Zəka ilə Saxtakarlığa Son Qoyur!

Google, Chrome brauzerində saxtakarlıq fəaliyyətlərinə qarşı yeni, süni zəka əsaslı təhlükəsizlik tədbirləri tətbiq edir. Şirkət, masaüstü versiyada Gemini Nano adlı böyük dil modelindən istifadə edərək istifadəçiləri fişinq və oxşar onlayn təhdidlərdən qoruyacaq. Bu model, veb saytlarının mürəkkəb quruluşunu təhlil edərək təhlükəsizlik qatlarını gücləndirir.

Chrome’un Təhlükəsiz Baxış xüsusiyyəti uzun müddətdir ki, istifadəçiləri zərərli saytlardan qorumaq üçün aktiv şəkildə istifadə olunur. Bu xüsusiyyətin Ətraflı Qoruma rejimi, Standart Qorumaya nisbətən iki dəfə çox təhlükəsizlik təklif edir. Google bu rejimi süni zəka modeli Gemini Nano ilə daha da inkişaf etdirir.

Bildirilir ki, Gemini Nano xüsusilə uzaqdan texniki dəstək saxtakarlığını aşkar etmək üçün istifadə olunur və bu model gələcəkdə müxtəlif növ saxtakarlığa qarşı da faydalı olacaq. Android cihazlarındakı Chrome brauzerində də əhəmiyyətli bir dəyişiklik tətbiq ediləcək. Mobil istifadəçilər artıq zərərli veb saytlardan gələn spam və yanıltıcı bildirişlər barədə xəbərdar ediləcəklər. Chrome-un cihaz üzərində maşın öyrənmə modeli sayəsində bu bildirişlər saxtakarlıq kimi qeyd olunacaq və istifadəçilərə onları ləğv etmək və ya bloklamaq imkanı təklif ediləcək.

Google həmçinin süni zəkanın axtarış motorunun tərəfində aktiv şəkildə istifadə olunduğunu bildirir. Şirkət tərəfindən verilən məlumata görə, süni zəka dəstəkli sistemlər sayəsində hər gün axtarış nəticələrində yüz milyonlarla saxtakarlıq cəhdi qarşısı alınır. Bu sistemlər ənənəvi üsullara nisbətən 20 dəfə çox saxtakarlıq hadisəsinin aşkarlanmasına kömək edir.