ABŞ-da 8 mindən çox uçuş təxirə salınıb və ya ləğv edilib

Birləşmiş Ştatlarda müşahidə edilən əlverişsiz hava şəraiti nəticəsində aviasiya sektorunda böyük problemlər yaranıb. Ən azı 8 mindən çox aviareys ya tamamilə ləğv olunub, ya da əhəmiyyətli dərəcədə gecikib.

Bu məlumat ixtisaslaşmış "FlightAware" portalına əsaslanır və "CBS News" telekanalı tərəfindən yayılıb. Bildirilib ki, yalnız noyabrın 30-da 7 460 reys gecikib, əlavə olaraq 664 uçuş isə ləğv edilib. Bu vəziyyət minlərlə sərnişinin səyahət planlarına təsir göstərib.

Meteoroloqlar ölkənin bir sıra ştatlarında müşahidə edilən qar və soyuq hava şəraiti barədə əvvəlcədən xəbərdarlıq etmişdilər. Ən çox ləğv və gecikmə halları iri şəhərlərin hava qovşaqlarında qeydə alınıb. Problemlər əsasən Boston (Massaçusets), Detroit (Miçiqan), Minneapolis (Minnesota), Nyu-York və Çikaqo (İllinoys) kimi Birləşmiş Ştatların hava limanlarında yaşanıb.