ABŞ Danimarkaya 3 milyard dollarlıq müasir hərbi sistem satır

ABŞ Dövlət Departamenti Danimarkaya 3 milyard dollar dəyərində İnteqrasiya Edilmiş Döyüş Komandanlığı Sisteminin (IBCS) potensial satışını təsdiqləyib. Bu sövdələşmə hava və raketdən müdafiə döyüş idarəetmə sistemlərini, eləcə də əlaqəli logistikanı əhatə edir. Pentaqonun Təhlükəsizlik Əməkdaşlıq Agentliyi (DSCA) bu barədə dekabrın 5-də açıqlama yayıb.

Hökumətlərarası müqavilələr əsasında xaricə hərbi texnika və silahların tədarükünə cavabdeh olan DSCA bildirir ki, bu sistem xüsusi hərbi imkanlara malikdir. Söhbət artilleriya atəşindən müdafiə vasitələri, yüksək dəqiqlikli silahlar və pilotsuz uçuş aparatları (PUA) ilə təchiz edilmiş sistemdən gedir. Sənədlərdə vurğulanır ki, təklif edilən satış ABŞ-nin xarici siyasəti və milli təhlükəsizlik hədəfləri ilə tam uyğundur. Bu, həm də ABŞ-nin NATO müttəfiqi olan Danimarkanın döyüş imkanlarını gücləndirməyə xidmət edir.

Bu böyük hərbi sövdələşmənin əsas podratçıları arasında "Lockheed Martin", "RTX Corporation" və "Northrop Grumman" kimi nəhəng şirkətlərin olması gözlənilir. ABŞ administrasiyası artıq Konqresi sistemin mümkün satışını təsdiqləmək qərarı barədə məlumatlandırıb. Qanunverici orqanın bu potensial razılaşmanı nəzərdən keçirmək və onu bloklamaq imkanı barədə düşünmək üçün 30 gün müddəti var. Bu müddət bitdikdən sonra satışın rəsmiləşməsi gözlənilir.