ABŞ-nin hərbi avtomobil karvanı Polşada qəzaya uğrayıb, xəsarət alanlar var

Polşada ağır yol qəzası baş verib. Hadisə zamanı **ABŞ hərbi avtomobil karvanı** qəzaya düşüb. Nəticədə dörd amerikalı əsgər və bir mülki şəxs xəsarət alıb, yaralılar dərhal xəstəxanalara yerləşdirilib.

Bu barədə məlumatı Dövlət Yanğından Mühafizə Xidmətinin Poznan şəhərindəki Baş İdarəsi öz feysbuk hesabında yayımlayıb. Qəza axşam saatlarında qeydə alınıb. Hadisə Böyük Polşa Voyevodluğundakı Buk şəhəri yaxınlığında, A2 magistralının 137-ci kilometrliyində baş verib.

Varşava istiqamətində hərəkət edən mikroavtobus "Hummer" tipli avtomobillərin də daxil olduğu Amerika hərbi maşın karvanı ilə toqquşub. Qəza yerinə gələn xilasedicilər bir nəfəri sıxılı vəziyyətdə qalan avtomobildən çıxardılar. Xəsarət alan beş nəfərin arasında mikroavtobusun sürücüsü olan mülki şəxs və **dörd ABŞ əsgəri** var.

Qəza səbəbindən Varşava istiqamətində nəqliyyatda ciddi sıxlıq yarandı, çünki magistralın bir zolağı bağlanmışdı. Hazırda ABŞ karvanındakı hərbi maşınların dəqiq sayı hələ müəyyən edilməyib.