ABŞ PUA-ların bəşəriyyət üçün təhlükə yaratdığını etiraf edib

ABŞ ordusu Pilotsuz uçuş aparatlarının (PUA) yaratdığı real təhlükəni rəsmi olaraq qəbul edir. ABŞ-nin Ordu naziri Daniel Driskoll CBS telekanalına müsahibəsində bu barədə məlumat verib.

Driskollun sözlərinə görə, müasir dronlar əldəqayırma partlayıcı qurğular kimi asanlıqla istifadə edilə bilər. Onlar ucuzdur, ev şəraitində 3D-çap etmək mümkündür və sərhədləri çox asanlıqla keçirlər. Nazir PUA-ları birbaşa bəşəriyyət üçün təhlükə adlandırıb. O, həmçinin Rusiya-Ukrayna müharibəsində dronların səbəb olduğu məhvetmənin miqyasına və sürətinə diqqət yetirməyin vacibliyini vurğulayıb.

Bu yeni təhdidlər səbəbindən ABŞ ordusuna pilotsuz təyyarələrə qarşı yeni müdafiə sistemləri inkişaf etdirmək tapşırılıb. Bu vəzifə ordunun indiyədək öhdəsinə götürdüyü işlərdən tamamilə fərqlidir, çünki yeni növ silahlara qarşı mübarizə aparmağı tələb edir. Nazir qeyd edib ki, federal hökumət dronlara qarşı mübarizədə lider mövqe tutmalıdır. Driskoll, ordunun düzgün iş gördüyünə inandığını söyləyərək bu vəziyyətdə optimist olduğunu bildirib.