Abşeronda Zəfər Günü ilə əlaqədar ağacəkmə aksiyası keçirilib (FOTO)

8 Noyabr Zəfər Günü ilə əlaqədar olaraq Abşeron rayonunda geniş miqyaslı ağacəkmə aksiyası həyata keçirilib. Tədbirdə Abşeron Rayon İcra Hakimiyyətinin (RİH) başçısı Abdin Fərzəliyev, rayonun hüquq-mühafizə orqanlarının rəhbərləri, YAP Abşeron Rayon Təşkilatının sədri, eləcə də şəhid ailələri, müharibə iştirakçıları, gənclər və rayon ictimaiyyətinin nümayəndələri iştirak edirdilər.

Aksiya Xırdalan şəhərində yerləşən, Ümummilli Lider Heydər Əliyevin adını daşıyan Parkda baş tutdu. Park ərazisində ümumilikdə 500 ədəd leylandr, eldar şamı, xan çinarı və dekorativ kollar əkildi. Əkilən ağaclar suvarıldı və onlara üzvi gübrə verildi. Bu tədbir həm də xalqımızın birlik ruhunu və şəhidlərimizin xatirəsinə hörməti göstərmək məqsədi daşıyırdı.

Aksiya bitdikdən sonra RİH başçısı Abdin Fərzəliyev şəhid ailələri və müharibə iştirakçıları ilə görüşdü. O, onların qayğıları ilə maraqlandı, Zəfər bayramı münasibəti ilə təbrik etdi. Abdin Fərzəliyev qeyd etdi ki, Azərbaycan Respublikasının Prezidenti, Müzəffər Ali Baş Komandan İlham Əliyevin uzaqgörən siyasəti, qətiyyətli qərarları və iradəsi sayəsində torpaqlarımız işğaldan azad edildi. Şəhidlərimizin və qazilərimizin şücaəti, ordumuzun döyüş əzmi və xalqımızın birliyi nəticəsində 30 illik Vətən həsrətinə son qoyuldu. Hazırda soydaşlarımız azad edilən torpaqlarda təhlükəsiz şəkildə yaşamağa başlayıblar.

Ölkədə şəhidlərin əziz xatirəsi hər zaman uca tutulur. Şəhid ailələrinə və müharibə iştirakçılarına göstərilən böyük diqqət və qayğı bundan sonra da davam edəcək. Görüşdə iştirak edən şəhid ailələri də onlara göstərilən dövlət səviyyəsində qayğıdan razılıqlarını bildirdilər. Onlar həyatlarının hər anında bu diqqəti hiss etdiklərini vurğulayıb, bütün bunlara görə Azərbaycan Prezidenti cənab İlham Əliyevə və Birinci Vitse-Prezident Mehriban xanım Əliyevaya təşəkkürlərini çatdırdılar.