AİB Orta Dəhliz boyunca CAREC-2-nin transformasiyası barədə danışıb (ÖZƏL)

Asiya İnkişaf Bankı (AİB) Orta Dəhlizin tamdəyərli iqtisadi marşruta çevrilməsi istiqamətindəki işlərin aktivləşməsi fonunda Mərkəzi Asiya və Cənubi Qafqazda əməkdaşlığı gücləndirir. Bu dəstək xüsusilə nəqliyyat, ticarət və enerji sahələrini əhatə edir. AİB-in Mərkəzi və Qərbi Asiya departamentinin baş direktoru Leya Qutyerresin sözlərinə görə, Bankın əsas təşəbbüslərindən biri CAREC-2 dəhlizinin Orta Dəhlizlə uzlaşdırılaraq inteqrasiya olunmuş iqtisadi dəhlizə çevrilməsidir. Həyata keçirilən tədbirlər investisiyaların birləşdirilməsi ilə yanaşı, bir sıra ölkələrdə tənzimləmə sahəsində islahatların aparılmasını da nəzərdə tutur. Bu fəaliyyətlərin yekun məqsədi **tranzit-Xəzər əlaqəliliyinin** artırılması, region iqtisadiyyatları ilə onların xarici tərəfdaşları üçün çıxış imkanlarının genişləndirilməsidir.

AİB hazırda CAREC-2 dəhlizinin inkişafı üçün xüsusi bir yanaşma hazırlayır. Bu yanaşma hökumətlərlə və digər inkişaf tərəfdaşları ilə əlaqələndirməni gücləndirməyə xidmət edəcək. Strategiya ilkin olaraq az xərcli, lakin yüksək təsirli tədbirlərə üstünlük verəcək. Bunların sırasına modernləşdirilmiş sərhəd-keçid məntəqələri, ticarətin rəqəmsallaşdırılması və logistika mərkəzlərinin inkişafı daxildir. L. Qutyerres bildirib ki, bu addımlar atılarkən, uzunmüddətli nəqliyyat yeniləmələri üçün də lazımi baza yaradılacaq. AİB, regiondakı təşəbbüslərin uzlaşdırılmasına yönələn Avropa Komissiyasının Transxəzər Nəqliyyat Dəhlizi üzrə Koordinasiya Platformasında da iştirak edir. Bu regional əməkdaşlıq **ticarət yollarının səmərəliliyini** yüksəltməyə yönəlib.

Energetika sahəsinə toxunan AİB nümayəndəsi, qurumun Asiya İnfrastruktur İnvestisiya Bankı (AIIB) ilə əməkdaşlığını genişləndirdiyini qeyd edib. Hər iki institut “Yaşıl enerji dəhlizi” layihəsinin texniki-iqtisadi əsaslandırmasının hazırlanmasına dəstək verir. Bu layihəyə görə, Mərkəzi Asiyadan Azərbaycana və buradan da Qərbə ötürülməsi planlaşdırılan elektrik enerjisi Xəzərin dibi ilə çəkilməsi nəzərdə tutulan kabel vasitəsilə çatdırılacaq. Bu təşəbbüs ekoloji cəhətdən təmiz enerji ticarətinə artan marağı əks etdirir. Bundan əlavə, bu layihə regionun əlaqəliliyini və uzunmüddətli **enerji təhlükəsizliyinin** möhkəmləndirilməsi üçün böyük imkan yaradır. Bu işlər AİB-in Mərkəzi və Qərbi Asiya regionunda iqtisadi transformasiyaya verdiyi dəstəyin tərkib hissəsidir.