Almaniya məhkəməsi parkda insanlara bıçaqla hücum edən əfqanı anlaqsız elan edib

Almaniyanın Bavariya məhkəməsi yanvar ayında şəhər parkında insanlara bıçaqla hücum edən əfqan miqrantı anlaqsız hesab edib. Məhkəmə bu şəxsin cinayət məsuliyyətinə cəlb edilməməsi, əvəzində psixiatrik xəstəxanaya yerləşdirilməsi barədə qərar verib.

Bu qərar, Aşeffenburq şəhərində baş verən dəhşətli hadisədən sonra verilib. Məhkəmənin apardığı psixiatrik ekspertizanın rəyi təsdiqləyir ki, həmin şəxs paranoid şizofreniyadan əziyyət çəkir. Beləliklə, o, törətdiyi əməllərə görə məsuliyyət daşıya bilməz.

Hadisə 22 yanvar tarixində, Aşeffenburqda (Bavariya) baş vermişdi. 28 yaşlı əfqanıstanlı şəxs parkda qarşısına çıxanlara bıçaqla hücum etmişdi. Bu şiddətli hücum nəticəsində 41 yaşlı bir kişi və 2 yaşlı uşaq həlak olub. Bundan əlavə, üç nəfər yaralanmışdı.

Hücum edən şəxs 2022-ci ilin noyabrında Almaniyaya gəlib. O, sığınacaq almaq üçün müraciət etsə də, tələbi rədd edilmişdi və hadisə baş verən zaman deportasiya gözləyirdi.