Almaniya nüvə tullantıları anbarları üzərində uçuşa qadağa zonası yaradacaq

Almaniya hökuməti nüvə tullantıları saxlama məntəqələrinin üzərində uçuş qadağası zonası yaratmağa hazırlaşır. Bu qərar hava məkanında aşkarlanan naməlum dronların sayının artması ilə əlaqədardır. Hökumət ölkədəki müvəqqəti radioaktiv tullantı anbarlarının təhlükəsizliyini qorumaq məqsədi daşıyır. Nüvə təhlükəsizliyinə cavabdeh olan Federal Ətraf Mühit Nazirliyinin nümayəndəsi bu barədə məlumatı NDR teleradioşirkətinə verib.

Nazirliyin nümayəndəsi bu addımı zəruri hesab edir. O bildirib ki, dron sahəsindəki mövcud texnoloji inkişaflar və bununla əlaqədar potensial olaraq dəyişən təhlükə mənzərəsi hakimiyyət orqanları üçün yeni çətinliklər yaradır. Federal hakimiyyət orqanları uçuş qadağası ilə bağlı yerli qurumlarla razılığa gəlib. Onların yekdil fikri budur ki, müvəqqəti saxlama obyektləri hava hücumlarından adekvat şəkildə qorunmalıdır. Bu qadağa zonası radioaktiv materialların saxlandığı strateji ərazilərin müdafiəsinin vacibliyini göstərir.

NDR-in məlumatına görə, uçuş qadağası Almaniyadakı mərkəzi müvəqqəti radioaktiv tullantı saxlama müəssisələri üzərində tətbiq olunacaq. Bura xüsusilə Almaniyanın şimal-şərqindəki Lubmin, eləcə də ölkənin qərbindəki Qorleben və Ahaus daxildir. Qadağanın 2026-cı il martın 19-da qüvvəyə minməsi gözlənilir. Qadağan olunmuş zonanın ölçüləri də dəqiqləşdirilib. Onun diametri 1,5 kilometr, hündürlüyü isə 600 metr təşkil edəcək.