AMB inflyasiyaya artırıcı təsir göstərən əsas amili açıqlayıb

Azərbaycan Mərkəzi Bankının (AMB) sədri Taleh Kazımov faiz dəhlizinin parametrlərinə dair keçirilən mətbuat konfransında illik inflyasiya proqnozlarını təqdim edib. Oktyabr proqnozlarına görə, 2025-ci ildə illik inflyasiya 0,3 faiz bəndi artaraq 6% təşkil edəcək. Bu yeni göstərici əvvəlki gözləntilərdən daha yüksəkdir. Mərkəzi Bankın bu proqnozlarına görə, 2026-cı ildə inflyasiyanın 0,4 faiz bəndi artaraq 5,7% olacağı gözlənilir.

Sədr inflyasiya proqnozunun yuxarıya doğru dəyişdirilməsinin səbəblərini də açıqlayıb. O bildirib ki, bu dəyişiklik əsasən təklif amilləri ilə bağlıdır. Buna təsir göstərən ən vacib amil kənd təsərrüfatı istehsalçılarının qiymətlərindəki artımlardır. Bu qiymət artımları inflyasiya səviyyəsinin gözləniləndən yuxarı qalxmasına aparıcı təsir göstərir.