Antarktidanın ən yüksək zirvəsini fəth edən azərbaycanlı: "Dağlara Allahın köməyi ilə gedirəm" - MÜSAHİBƏ

Azərbaycanlı alpinist Elmira Aslanova Antarktidanın ən hündür zirvəsi olan Vinson dağını (4892 metr) fəth edib. İdmançı dünyanın ən soyuq bölgələrindən birini seçməsinin səbəbləri, eləcə də səyahət zamanı qarşılaşdığı çətinliklər barədə danışıb. Vinson dağı "7 Zirvə" layihəsinə daxildir. Aslanova bu proqramda irəlilədiyini və bu zirvəni fəth etməyin onun böyük arzusu olduğunu bildirir. O bilirdi ki, Antarktidadakı ən ciddi maneə hava şəraitidir. Baxmayaraq ki, orada hazırda yay mövsümüdür və günəş 24 saat batmır, havanın temperaturu -25 dərəcədir.

Zirvədə isə temperatur -40 dərəcəyə qədər düşür. Üstəlik, soyuq küləklər şəraiti daha da ağırlaşdırır. Alpinistlər deyirlər ki, "pis hava yoxdur, düzgün seçilməmiş geyim var." Buna görə də Aslanova geyiminə xüsusi fikir verməli olub. O, əsas isti əlcəkləri ilə yanaşı, təşkilatçının siyahısında göstərilən əlavə əl geyimi də alıb. Elmira Aslanova üçün zirvəyə gedən yol gözlənilməz bir çətinliklə kəsilib. Adətən zirvəyə çıxış orta hesabla 7 saat çəkir. Lakin hədəfə cəmi 1,5 saat qalmış eynəyinin kənarı qopub düşüb. Onu düzəltmək üçün əsas isti əlcəklərini çıxaranda, əlləri dərhal donmağa başlayıb. Bələdçi vəziyyəti görəndə onu təcili geri göndərməyi qərara alıb və əlcəkləri tez geyinməyi əmr edib. O, barmaqların donmasının riskli olduğunu söyləyərək, idmançını aşağı düşərgəyə yola salıb.

Aslanova zirvəyə bu qədər yaxın ikən geri endirilməyin şokunu yaşayıb, lakin bələdçisinə bir şərtlə razılaşıb: növbəti gün yenidən şans verilməli idi. Düşərgəyə qayıdanda o, səhəri gün yenidən cəhd etmək arzusunu bildirdi. Nəzarətçilər bu təcrübələrində ilk dəfə belə bir hal yaşandığını deyərək, bunun mümkün olmayacağını söylədilər. Onlar idmançının bir gün əvvəlki yorğunluqdan sonra yenidən yola çıxmağa gücünün qalmayacağını düşünürdülər. O, israr etməyə başladı və sonda rəhbərliklə danışıqdan sonra ona ikinci şans verildi. Səhər Tom adlı bələdçi ilə yola çıxdı və bu şansa çox sevindiyini deyib. Aslanova zirvəyə çatacağına həmişə inanırdı. O bildirir ki, bütün şübhələr yola çıxmamışdan əvvəl aradan qaldırılmalıdır. O, Allaha çox güvənir və yolunu davam etdirməkdə Ona arxalanır. Hətta gücünün bitdiyini düşündüyü anlarda belə, haradansa enerji tapdığını və bunu Allahın köməyi hesab etdiyini deyir. Bu inanc sayəsində o, əvvəlki gün çox yorğun olmasına baxmayaraq, ikinci gün zirvəyə qalxa bilib.

Alpinist bildirib ki, son 3 ayda sağlamlıq vəziyyəti imkan vermədiyi üçün idmanla məşğul olmayıb. Səfərdən əvvəl isə soyuqdəymə keçirdiyi üçün yalnız sağalmağa diqqət edib. O, daha əvvəl dünyanın ən hündür zirvəsi Everesti fəth etməsinin təcrübə baxımından kömək göstərdiyini qeyd edib. Hər dağa çıxış bir təcrübədir. O, bədəninin soyuğa və çətinliklərə necə reaksiya verdiyini, düzgün nəfəs alıb yeriməyi artıq bilir. Alpinizmdə özünü tanımaq əsas şərtdir və bu, yalnız təcrübə ilə əldə edilir. Növbəti səfəri gələn il may-iyun aylarında Alyaskadakı Denali dağına olacaq. Bir çoxları Denalini Everestdən də çətin hesab edir. Denalidə hava şəraiti sərtdir və Everestdən fərqli olaraq bələdçi yoxdur. Alpinist hər şeyi - geyimləri, çadırları, avadanlıqları və bir neçə günlük yeməyi (orta hesabla 50 kq) özü daşımalı olur. Buna görə də Denali "dürüst dağ" adlanır. Gələcəkdə Aslanova xeyriyyə layihələri ilə məşğul olmaq və uşaqlara kömək etmək arzusundadır.