Arif Əsədov: "Qarabağ" Çempionlar Liqasının əsas mərhələsində ilk "8-liy"ə də düşə bilər"

Azərbaycan millisinin sabiq məşqçisi Arif Əsədov "Qarabağ" klubunun UEFA Çempionlar Liqasının əsas mərhələsində hətta ilk "8-liy"ə düşmə şansının olduğunu bildirib. O, Ağdam təmsilçisinin ötən gün İngiltərənin "Çelsi" klubu ilə 2:2 hesabı ilə heç-heçə etdiyi oyuna toxunub. Mütəxəssis komandanın göstərdiyi oyundan qürur duyduğunu dedi. Əsədovun sözlərinə görə, bütün Azərbaycan xalqı bu komanda ilə fəxr edir. Belə güclü rəqibə qarşı bərabər futbol sərgiləmək möhtəşəmdir.

Matçın ilk dəqiqələrində oyunçularda bir həyəcan var idi, rəqibin gücü və təzyiqi özünü göstərirdi. Lakin komanda sonradan özündə xarakter tapdı və geriyə dönüş edə bildi. Komanda baş məşqçinin verdiyi bütün tapşırıqları düzgün yerinə yetirdi, meydanda nizam-intizamı qorudu. Həmçinin, əks-hücumlarda rəqib üçün ciddi təhlükə yaradırdılar. A. Əsədov hesab edir ki, bu heç-heçə nəticəsi əslində qələbəyə bərabərdir.

Sabiq məşqçi bəzi oyunçularda 70-ci dəqiqədən sonra yorğunluq hiss olunduğunu qeyd etdi. Bu o demək deyil ki, "Qarabağ" fiziki cəhətdən hazır deyil. Əsədov vurğuladı ki, rəqibin təzyiqi çox idi. Qarşıdakı rəqibin "Çelsi" olduğunu unutmamaq lazımdır; bu klub İngiltərə Premyer Liqasında çıxış edir və dəfələrlə ölkə çempionu olub. 70-ci dəqiqədən sonra Qurban Qurbanovun etdiyi dəyişikliklər sayəsində komanda istədiyi nəticəni əldə etdi.

Veteran futbolçu Azərbaycan çempionu olan "Qarabağ"ın növbəti mərhələ şanslarını yüksək qiymətləndirir. O düşünür ki, komanda "24-lüy"ə düşmək üçün lazım olan işin 70-80 faizini artıq görüb. Əgər bu cür oyun nümayiş etdirilməyə davam etsə, hətta "8-liy"ə düşmək ehtimalı da yaranır. Futbolda hər cür nəticə qeydə alına bilər, çünki rəqiblər də qeyri-sabit çıxış edirlər. Buna baxmayaraq, "Qarabağ"ın pley-off şansı çox yüksəkdir. Bunun üçün isə evdə keçiriləcək iki matçda ən azı 4 xal toplamaq vacibdir.