Avropa öz gücünü doğru qiymətləndirmir - Kaya Kallas

Avropa öz gücünü, xüsusilə Rusiyaya qarşı olan qüvvəsini olduğundan aşağı qiymətləndirib. Biz Avropa olaraq özümüzə daha çox inanmalıyıq. Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi və Avropa Komissiyasının vitse-prezidenti Kaya Kallas bu fikirləri "Doha Forumu"nda çıxışında deyib.

Kallas qeyd edib ki, kollektiv özünə inamın aşağı olması Avropanın xarici siyasətdəki effektivliyinə təsir edir. Onun sözlərinə görə, Avropa öz potensialını daha həqiqi dəyərləndirməlidir. Bu, xüsusən də Rusiya ilə münasibətlərin idarə edilməsi üçün əhəmiyyət daşıyır.

O, transatlantik əlaqələrə toxunaraq, ABŞ-nin hələ də Avropanın ən böyük müttəfiqi olduğunu vurğulayıb. Kallas bildirib ki, Avropa da ABŞ üçün ən böyük müttəfiq olaraq qalır. Avropanın güclü və davamlı olması Amerika Birləşmiş Ştatlarının maraqlarına uyğundur. O etiraf edib ki, tərəflər hər mövzuda həmişə eyni fikirdə olmasalar da, ümumi prinsip dəyişməyib: "Biz ən böyük müttəfiqlərik və birlikdə qalmalıyıq".