AZAL 20-dən çox beynəlxalq istiqamət üzrə reyslərin tezliyini artırır

“Azərbaycan Hava Yolları” (AZAL) 2025-ci ilin qış uçuş cədvəlini xeyli genişləndirir. Şirkət London, Barselona, Milan, Male və digər şəhərlər də daxil olmaqla, 20-dən çox beynəlxalq istiqamət üzrə reyslərin sayını artırıb. Yenilənmiş qrafikə əsasən, AZAL 2025-ci ilin oktyabr ayının sonundan etibarən fəaliyyətini gücləndirəcək.

Bu plan Avropa, Yaxın Şərq və Asiyanın əsas marşrutlarında hava yolu şirkətinin mövqeyini möhkəmlətməyə yönəlib. Bu addım həm də Azərbaycanın Avropa ilə Asiyanın qovşağında mühüm nəqliyyat və turizm mərkəzi kimi yerini gücləndirmək məqsədini əks etdirir. Reyslərin tezliyinin artırılması Heydər Əliyev Beynəlxalq Aeroportu vasitəsilə transfer imkanlarını genişləndirir.

2025-ci ilin qış cədvəlində reyslərin tezliyi əvvəlki illə müqayisədə əhəmiyyətli dərəcədə yüksəlib:

• Milan, Mumbay, Nyu-Dehli, Kişineu və Daşkənd: hər istiqamət üzrə həftədə 7 reys (ötən il 3–5 reys olub);
• Almatı, Ciddə və Astana: hər biri üzrə həftədə 5 reys (əvvəl 2–4 reys icra edilirdi);
• Barselona, London (Qetvik hava limanı) və Ər-Riyad: hər istiqamət üzrə həftədə 4 reys (ötən il 3 reysədək həyata keçirilirdi);
• Bişkek, Düşənbə, Male və Pekin: hər istiqamət üzrə həftədə 3 reys (əvvəl 2 reys icra olunurdu);
• Səmərqənd və Ürgənc: hər biri üzrə həftədə 2 reys (ötən il bu istiqamətlərə uçuş yox idi).

Daha çevik uçuş qrafiki sərnişinlərin səyahət rahatlığını artırır. Əlaqəli reyslər tənzimlənib, uçuş və eniş vaxtları sərnişinlərin rahatlığına uyğunlaşdırılıb. AZAL bazar tələblərinə uyğunlaşan strategiyasını davam etdirir. Şirkət istirahət və işgüzar səfərlər üçün populyar istiqamətləri inkişaf etdirməyə davam edir, müasir təyyarə parkı ilə rəqabətədavamlı xidmətlər təklif edir. Reyslərin tezliyinin artırılması Bakı hava limanını Qərb və Şərq arasında aparıcı nəqliyyat mərkəzi kimi görən sərnişinlər üçün əlavə imkanlar yaradır. Aviabiletləri aviaşirkətin rəsmi saytı və mobil tətbiqi, həmçinin kassalar və akkreditə olunmuş agentliklər vasitəsilə əldə etmək mümkündür.