Azər Əmiraslanov: "Azərbaycan iqtisadi müstəqillik baxımından uğur hekayəsi yazıb"

Deputat Azər Əmiraslanov Azərbaycanın iqtisadi müstəqilliyini yüksək qiymətləndirib. O, Milli Məclisin İqtisadi siyasət, sənaye və sahibkarlıq komitəsinin elmi-praktik konfransında çıxış edərkən bildirib ki, Azərbaycan iqtisadi müstəqillik sahəsində böyük uğur hekayəsi yaradıb. Əmiraslanovun sözlərinə görə, hazırda bir çox ölkənin suverenliyi formal xarakter daşıyır, lakin Azərbaycanın durumu fərqlidir. Ölkənin milli iqtisadiyyatı birbaşa milli maraqlara cavab verir.

Millət vəkili müstəqilliyin əldə edilməsi yolundakı tarixi məqamlara toxunub. O xatırladıb ki, Azərbaycan bir zamanlar Sovet İttifaqı daxilində öz iqtisadiyyatını qururdu. Belə bir sistemdə isə milli maraqları tam təmin etmək hər zaman mümkün olmurdu. İndi ölkəmiz milli iqtisadiyyatını tamamilə özü qurur və bu, milli maraqları təmin etməyə kömək edir. Bu müstəqilliyin möhkəmlənməsi dövlətin gücünü artırır.

Azər Əmiraslanov iqtisadi müstəqilliyin xarici siyasətdəki manevr imkanlarını gücləndirdiyini də vurğulayıb. Bu müstəqillik sayəsində iqtisadi diplomatiyanı həyata keçirmək mümkün olur. Deputat qeyd edib ki, bəzən mütləq iqtisadi müstəqilliyin olmadığı fikri səsləndirilir. Dünyada heç bir ölkə mütləq iqtisadi müstəqilliyə malik deyil, bu məsələ nisbidir, lakin həmişə aktualdır. İqtisadi asılılıq siyasi güzəşt riskləri yaradır. Buna görə də, iqtisadi təhlükəsizlik tədbirləri ilə asılılığın aradan qaldırılması Azərbaycan siyasətində həmişə böyük əhəmiyyət kəsb edib.