Azərbaycan-Belarus Müdafiə nazirlikləri pilotsuz uçuş aparatları sahəsində əməkdaşlığı müzakirə edib

Azərbaycan və Belarus Müdafiə nazirlikləri arasında ikitərəfli hərbi əlaqələrə dair işçi görüş keçirilib. Bu görüş 2025-ci il üçün təsdiqlənmiş hərbi əməkdaşlıq planına uyğun təşkil edilib.

Əsas məqsəd “Pilotsuz aviakomplekslərin tətbiqi və pilotsuz uçuş aparatları operatorlarının hazırlanması sahəsində əməkdaşlıq” məsələsini müzakirə etmək idi. Görüşdə Belarus nümayəndə heyəti iştirak edib, bu barədə Müdafiə Nazirliyi məlumat yayıb. Tərəflər insansız hava sistemləri (İHS) sahəsində ətraflı fikir mübadiləsi aparıblar. Onlar bu istiqamətdə əməkdaşlığın genişləndirilməsi imkanlarını dəyərləndirərək maraq doğuran bir sıra məsələlərə toxundular. Xüsusilə pilotsuz uçuş aparatlarının effektiv tətbiqi və onları idarə edəcək şəxslərin hazırlanması prosesi müzakirə olunan əsas mövzulardan idi.

Hər iki ölkə bu sistemlərin tətbiqi sahəsində birgə fəaliyyətlərin vacibliyini qeyd edib. İşçi görüşün sonunda qarşılıqlı hədiyyələr təqdim edilib və xatirə şəkli çəkdirilib. Bu cür məsləhətləşmələr Azərbaycan və Belarus arasında 2025-ci ildə hərbi sahədə əlaqələrin daha da inkişaf etdirilməsinə xidmət edir.