Azərbaycan Həndbol Federasiyasında yeni təyinat olub

Azərbaycan Həndbol Federasiyasında (AHF) mühüm kadr dəyişikliyi baş verib. "Azəryol" həndbol komandasının sabiq baş məşqçisi Vidadi Əliyev federasiyanın cənub bölgəsi üzrə koordinatoru təyin edilib.

Yeni koordinatorun əsas vəzifəsi regionda həndbolun inkişafı ilə bağlıdır. O, Astara, Cəlilabad, Lənkəran, Lerik, Masallı və Yardımlı kimi cənub bölgəsi rayonlarında işlərə başlayacaq. V. Əliyevin rəhbərliyi altında 2012-2013-cü il təvəllüdlü oğlanlardan ibarət yeni komandaların formalaşdırılması istiqamətində işlər görüləcək.

Vidadi Əliyevin zəngin məşqçilik təcrübəsi var. O, bu təyinata qədər həm kişilərdən ibarət "İdman Akademiyası" komandasına rəhbərlik edib, həm də milli komandanın baş məşqçisi vəzifəsində çalışıb.