Azərbaycan HHQ komandanı təyyarə qəzasında şəhid olan Türkiyə hərbçiləri ilə vida mərasimində iştirak edir

Azərbaycan Hərbi Hava Qüvvələrinin komandanı, general-leytenant Namiq İslamzadə Azərbaycandan Türkiyəyə uçarkən Gürcüstan ərazisində qəzaya uğrayan C-130 hərbi nəqliyyat təyyarəsində şəhid olan Türkiyə hərbçiləri ilə vida mərasimində iştirak edib. General-leytenant İslamzadənin rəhbərlik etdiyi nümayəndə heyəti 20 şəhid hərbçi üçün Ankarada, Mürted Hava Bazasında keçirilən mərasimə qatılıb.

Bu vida mərasimi təyyarə qəzası nəticəsində həlak olan hərbçilərin xatirəsinə hörmət əlaməti olaraq keçirilib. Mərasimdə şəhidlərin ailələri və yaxınları ilə yanaşı, yüksək rütbəli siyasətçilər və Türkiyə Silahlı Qüvvələrinin rəhbər heyəti də iştirak ediblər. Hərbçilərin 19-u bu gün torpağa tapşırılacaq. Təkcə pilot polkovnik-leytenant Gökhan Korkmazın cənazəsi şənbə günü İstanbulda dəfn olunacaq. Azərbaycanın vida mərasimində iştirakı iki ölkə arasındakı sıx hərbi əməkdaşlığı və qardaşlıq münasibətlərini bir daha göstərir.

Türkiyəyə məxsus C-130 hərbi nəqliyyat təyyarəsi noyabrın 11-də Azərbaycandan Türkiyəyə uçarkən Gürcüstan ərazisində qəzaya uğradı. Qəza nəticəsində təyyarədə olan 20 hərbçinin hamısı həyatını itirdi. Türkiyə Milli Müdafiə Nazirliyi qəzaya uğrayan təyyarədə hərbi sursatın olmadığını açıqladı. Həlak olan heyət Zəfər Günü ilə əlaqədar Azərbaycana getmiş F-16 təyyarələrinə texniki xidmət göstərən personal idi. Təyyarə Kayseridən Gəncəyə uçuşu həyata keçirdikdən sonra 13:15-də yenidən havaya qalxmış və 13:50-də Tbilisi ilə sonuncu dəfə əlaqə saxlamışdı.

Nazirlik hadisənin dəqiq səbəbinin hələlik bilinmədiyini qeyd edir. Təyyarə Tbilisinin cənubunda, Azərbaycan-Gürcüstan sərhədində qəzaya uğrayıb. Qəza yerində başqa bir helikopterin olması ilə bağlı yayılan iddialara da aydınlıq gətirildi; bu helikopterlər Gürcüstana məxsus idi. Türkiyə Müdafiə Nazirliyi C-130 təyyarələrinin istismar müddətinin başa çatması barədə səslənən iddialara cavab verdi. Nazirlik bildirdi ki, sözügedən təyyarə mütəmadi olaraq texniki xidmətdən keçirilir və bu tip təyyarələr hal-hazırda 70-dən çox ölkədə aktiv şəkildə istifadə olunur.