Azərbaycan Mərkəzi Bankı Yaşıl İstiqraz Fonduna investisiya edib

Azərbaycan Mərkəzi Bankı (AMB) valyuta ehtiyatlarının diversifikasiyası planı çərçivəsində mühüm bir addım atıb. AMB 2021-ci ilin mart ayında Beynəlxalq Hesablaşmalar Bankı (BHB) tərəfindən yaradılmış Yaşıl İstiqraz Fonduna investisiya edib. Bu fond ABŞ dollarında denominasiya olunub.

AMB sədri Taleh Kazımovun "Central Banking" onlayn jurnalında dərc olunan məqaləsində bu investisiya barədə qeyd edilib. Kazımovun sözlərinə görə, Fond ciddi ekoloji standartlara cavab verən yüksək keyfiyyətli "yaşıl istiqrazlar"dan ibarətdir. Bu standartlar Yaşıl İstiqraz Prinsipləri və İqlim İstiqrazı Təşəbbüsü tərəfindən müəyyən edilmiş İqlim İstiqraz Standartı kimi tanınmış meyarlarla müəyyən edilir. Fond mərkəzi bankların "yaşıl aktiv"lərə yatırımlarını birləşdirir, onları fərqli portfelə investisiya edir. Bu portfel suveren "yaşıl istiqraz"lar, beynəlxalq maliyyə təşkilatları tərəfindən buraxılmış istiqrazlar və minimum "A-" və ya ekvivalent kredit reytinqli "yaşıl istiqraz"ları ehtiva edir.

AMB Yaşıl İstiqraz Fondunda iştirakı ilə iqliməyararlı və ekoloji cəhətdən dayanıqlı layihələrin maliyyələşdirilməsinə töhfə verir. Beləliklə, bank qlobal səviyyədə daha "yaşıl" və daha dayanıqlı iqtisadiyyata keçidi dəstəkləyir. T. Kazımov onu da bildirib ki, Azərbaycan Mərkəzi Bankı aparıcı mərkəzi bankların təcrübələrindən faydalanaraq "yaşıl pul" siyasəti alətlərinin tətbiqi imkanlarını fəal şəkildə araşdırır. Hələlik bu alətlərin tam inkişafı üçün mövcud şərait ideal olmasa da, AMB makroiqtisadi mühitdə dəyişikliklərə uyğun olaraq zəruri addımları atmağa hazırdır.