Azərbaycan və Çin ekspertlərinin iştirakı ilə innovasiya ekosistemində imkanlar və çağırışlar müzakirə edilib (FOTO)

Beynəlxalq Telekommunikasiya İttifaqının (BTİ) Regional Akselerasiya Mərkəzinin açılış mərasimi çərçivəsində əhəmiyyətli bir panel müzakirəsi keçirildi. Tədbir “İnnovasiya ekosistemində imkanlar və çağırışlar” mövzusuna həsr olunmuşdu. Bu müzakirə Azərbaycan və Çin arasında təcrübə mübadiləsi üçün vacib bir platforma oldu. Paneldə BTİ-nin Çindəki Qlobal Akselerasiya Mərkəzinin nümayəndəsi Ke Vanq, Regional Akselerasiya Mərkəzinin nümayəndəsi Ku Janq və BTİ-nin Azərbaycandakı Regional Akselerasiya Mərkəzinin nümayəndəsi Elvin Hacıyev çıxış etdi.

Çıxışı zamanı Elvin Hacıyev Azərbaycan İnnovasiya Mərkəzinin yerli ekosistemin inkişafında oynadığı rolu qeyd etdi. O bildirdi ki, Mərkəz cəmi bir il fəaliyyət göstərməsinə baxmayaraq, innovasiya ekosistemini vahid bir çətir altında toplamağı bacarıb. Bu qısa müddət ərzində 200-dən çox proqram həyata keçirilib. Hacıyev əlavə etdi ki, BTİ akselerasiya mərkəzi şəbəkəsinə qoşulmaq fəaliyyətimizi regional və qlobal səviyyədə daha da gücləndirəcək. Bakıdan əlavə, innovasiya mərkəzləri ölkənin regionlarında da yaradılır. Keçən il “Sumgait Innovation Hub”, bu il isə Naxçıvan İnnovasiya Mərkəzinin əsası qoyulub. Bu mərkəzlər innovatorlar üçün geniş şərait təqdim edir, bura elmi və prototipləşdirmə laboratoriyaları, həmçinin aparıcı ekspertlərin mentorluğu ilə təşkil edilmiş təlim və vörkşoplar daxildir.

Çini təmsil edən mütəxəssislər öz ölkələrinin spesifik iqtisadi modeli ilə uzlaşan innovasiya ekosisteminin xüsusiyyətlərindən bəhs etdilər. BTİ-nin Çindəki Qlobal Akselerasiya Mərkəzinin nümayəndəsi Ke Vanq akselerasiya mərkəzlərinin “rəqəmsal uçurum”un azaldılmasında mühüm bir hissə olduğunu vurğuladı. O, bu mərkəzlərin inklüziv bir ekosistemin formalaşmasına kömək etdiyini söylədi. BTİ-nin Çindəki Regional Akselerasiya Mərkəzinin nümayəndəsi Ku Janq isə çıxışında təmsil etdiyi Mərkəzin BRICS ölkələrində rəqəmsal transformasiya və sahibkarlıq təşəbbüslərinə fokuslandığını qeyd etdi. Süni intellekt və robot texnologiyalarının sənaye və cəmiyyət üçün yaratdığı böyük şanslar fonunda uyğun kadr potensialı və maliyyələşmə kimi çətinliklərin də aktuallığının artdığını bildirdi.